Санкт-Петербург куоракка Саха Өрөспүүбүлүкэтин судаарыстыбаннаһын күнэ бэлиэтэннэ. Саха сириттэн биир дойдулаахтар балаҕан ыйын 27 күнүгэр түмсэн, өрөспүүбүлүкэҕэ тирээн турар соруктар, кэлэр тэрээһиннэр тустарынан кэпсэттилэр.
Сахалар ханна да олордорбут, төрөөбүт дойдубутун кытта сибээспитин быспаппыт, өрөспүүбүлүкэбит бэлиэ күннэрин ыһыктыбакка бэлиэтиибит. Ол сиэринэн, дойдубут култуурунай киинигэр РФ президенин иһинэн СӨ бэрэстэбиитэлистибэтин Санкт-Петербурдааҕы түмсүүтэ Саха сириттэн олохсуйбут биир дойдулаахтары ыҥыран, үөрүүлээх быһыыга-майгыга үбүлүөйдээхтэри, ону сэргэ регионнар икки ардыларыгар сибээһи олохтооһуҥҥа кылааттарын уурса сылдьар ытык дьону бэлиэтээтэ.
РФ президенин иһинэн СӨ бастайааннай бэрэстэбиитэлин солбуйааччыта Юрий Кравцов мустубут дьону Ил Дархан уонна Бырабыыталыстыба аатыттан истиҥник эҕэрдэлээтэ уонна тирээн турар соруктары, кэлэр тэрээһиннэри кытта билиһиннэрдэ.
Быйылгы дьыл төрөөбүт дойдубутугар хаһан да буолбатах улахан хоромньулаах баһаардарынан бэлиэтэннэ. Төһө да Саха сириттэн ыраах олордорбут, биир дойдулаахтар туора туран хаалбакка, аһымал, көмө аахсыйаҕа кыттыһан, ким-туох кыахтааҕынан көмөлөстүбүт. Маныаха тус сыратын, дууһатын уурбут киһинэн сахалар уопсастыбаларын салайааччыта Гаврил Троев буолар. Кини бастакынан тыл түһэрэн, кылгас кэм иһигэр үбүнэн, туттар тэрилинэн көмө оҥоһулла охсубута. Ол түмүгэр ойуур баһаардарыттан улаханнык эмсэҕэлээбит Горнай улууһун дьаһалтата Санкт-Петербурга олорор биир дойдулаахтарыгар барыларыгар махталын тириэрдибитин, бу бэлиэ күн ааҕан иһитиннэрдилэр.
Өрөспүүбүлүкэбит Судаарыстыбаннаһын күнэ манан эрэ муҥурдаммакка, саха норуотун омук быһыытынан уратыбытын үйэтиппит сүдү суолталаах ытык киһибит, саха суругун-бичигин төрүттээбит Семен Новгородов көмүс уҥуоҕар тыыннаах сибэкки дьөрбөтүн ууруутунан эмиэ бэлиэтэннэ.
Ааптар: Анфиса Слепцова, РФ суруналыыстарын сойууһун чилиэнэ, Санкт-Петербург к.
