17 От ыйа 17.07
  • 18°
  • $ 88,28
  • 96,26

Сахалар Израиль чулуу спортсменнарын тыҥааһыннарын уйбатылар

12:32, 16 мая 2016
Текст:
Читайте нас на
Яндекс Новости
ЯДВ

Тайскай босксаҕа Израиль бастыҥ спортсменнара Омар Аммаш уонна Виталий Хмельнитскай Саха сиригэр ыытыллыбыт норуоттар икки ардыларынааҕы турнирга кыайыы көтөллөннүлэр.


«Вызов Якутии» турнирга Александр Расторгуев (Саха сирэ) уонна Омар Аммаш (Израиль), Александр Прядченко (Саха сирэ) уонна Виталий Хмельнитскай (Израиль) киирсиилэрэ турнир эргийэр киининэн буоллулар.

Александр Прядченко уонна Виталий Хмельнитскай бастаан утаа тэҥ-тэҥҥэ киирсэн испиттэрэ. Кинилэр бэйэлэрин бастыҥ ньымаларын хото тутуннулар, кыайыы иһин дьулуурдаахтык кииристилэр. Бу кэнниттэн судьуйалар санаалара хайдыһа сырытта. Ол эрээри, кыайыылаах үрдүк аата Виталий Хмельнитскайга бэрилиннэ.

«Ыарахан тургутуһуу буолла. Ол эрээри, биһиги утумнаахтык дьарыктаммыппыт өттө. Олус ыраах айаннаан кэллибит, онон кыайыыттан муҥура суох үөрэбит. Сахалар спортсменнаргыт олус күүстээхтэр. Маннык турнирга өссө ыҥырдахтарына, булгуччу кэлиэм», — диэн СИА-ҕа Виталий Хмельнитскай эттэ.

Александр Расторгуев уонна Омар Ашиш чаҕылхайдык кииристилэр. Саха боксера элбэх үчүгэй ньыманы тутунна. Ол да буоллар, кыайыы ыалдьыкка иҥэрилиннэ. Күрэхтэһии кэнниттэн Александр Расторгуев кыайтарбытын иһин биир дойдулаахтара бырастыы гыналларыгар көрдөстө уонна таптыыр кыыһа кэргэн тахсарыгар этии оҥордо.

«Хомойуох иһин, кыайтардым. Кыайтарыы киһини өссө ордук уһаарар, онон өссө дьулуурдаахтык дьарыктаныам. Утарсааччым идэтийбит спортсмен буолара хас хамсаныытыгар, туттуутугар-хаптыытыгар барытыгар көстө, биллэ сылдьар», — диэтэ Александр Расторгуев.

Омар Аммаш саха спортсменыгар үчүгэй утарсыы иһин махтанна. «Александр үчүгэйдик кииристэ. Кинини кытта күөн көрсүү, биллэн турар, миэхэ туспа уопут. Төһө да эчэйиилээҕин иһин, үчүгэй киирсиини көрдөрдө. Аан дойду бастыҥ рингаларыгар инникитин да көрсүөм дии саныыбын», — диэтэ кини.

«Турнир быйыл бастакы төгүлүн ыытылынна. Сыл аайы ыытар санаалаахпыт. Кэлэр сылга омук дойдуларыттан улахан ааттаах-суоллаах спортсменнар кэлиэхтэрэ, ол эрээри билигин кинилэр ааттарын кистэлэҥҥэ тутабыт. Александр Расторгуев, Александр Прядченко кыайыыга ураты дьулуурдарын ордук чорботон бэлиэтиэх этим», — диэн СИА-ҕа турниры тэрийээччи Айсен Тихонов эттэ.

«Вызов Якутии» турнир кыайыылаахтара:

Тайскай бокс:

48 кг диэри — Андрей Пахомов (утарсааччыта Сергей Курепа);

45 кг диэри — Федор Кочетков (утарсааччыта Константин Соловьев);

57 кг диэри — Гавриил Мигалкин (утарсааччыта Андрей Верещака);

60 кг диэри — Сергей Сорокин (утарсааччыта Александр Машкевич);

57 кг диэри — Айаал Мигалкин (утарсааччыта Владимир Иванов);

81 кг диэри — Омар Амаш (утарсааччыта Александр Расторгуев);

68 кг диэри — Виталий Хмельницкай (утарсааччыта Александр Прядченко);

ММА:

70 кг диэри — Алексей Скрябин (утарсааччыта Евгений Сегвенидзев);

70 кг диэри — Азамат Бакитов (утарсааччыта Владимир Федоров).

Дьулустаан Сергеев суруйуута.

Дмитрий Семенов хаартыскаҕа түһэриитэ.

Следите за самым важным и интересным в Telegram-канале и WhatsApp-группе ЯСИА
Тутаах тыллар