21 саастарыгар диэри юниордарга көҥүл тустууга норуоттар икки ардыларынааҕы күрэхтэһии от ыйын 24 күнүгэр Бурятияҕа ыытыллыаҕа. Саха сирин сүүмэрдэммит хамаандатын 19 спортсмен көрдөрүөҕэ, диэн иһитиннэрэр ЯСИА.
Турнир аан дойду чөмпүйүөнэ Борис Будаев чиэһигэр ананыаҕа. Монголияттан, Кыргызстантан спортсменнар кыттыахтара, ону тэҥэ Саха сирин, Тываны, Иркутскай, Кемерово уобаластарын, Забайкалье, Красноярскай кыраайдар хамаандалара сайаапкаламмыттар. Саамай бөдөҥ хамаанданы Бурятия туруорарга бэлэмнэнэр.
Мэтээллэр уон ыйааһын категориятыгар оонньонуохтара, кыайыылаахтарга — 30 тыһыынча солкуобай, үрүҥ көмүс призердарга — 20 тыһыынча, боруонса призердарга — 10 тыһыынча туттарыллыаҕа.
Саха сирин сүүмэрдэммит хамаандатын састаабын Спортивнай бэлэмнэнии өрөспүүбүлүкэтээҕи киинэ биллэрдэ. 57 кг диэри ыйааһыҥҥа саамай элбэх тустуук күрэхтэһиэҕэ: Роман Кириллин, Анатолий Иванов, Дмитрий Данилов, Михаил Осипов, Вадим Прядезников, Александр Жданов уонна Денис Игнатьев.
Максим Григорьев уонна Күндүл Местников 61 кг диэри киирсиэхтэрэ. 65 кг диэри түөрт тустуук: Максим Трофимов, Ернест Яковлев, Сэмэн Сивцев уонна Влад Ноговицын.
Анатолий Иванов уонна Айкар Марков 70 кг диэри көбүөргэ тахсыахтара. Бу ыйааһыҥҥа Борис Будаевтан анал бириис күүтүллэр. Ону тэҥэ Саха сирин хамаандатыгар Давид Чириков (74 кг), Нозим Сафаров (79 кг), Степан Иванов (92 кг) уонна Адам Николаев (125 кг) киирдилэр.
