Саха сиригэр уматыгы, дойду сорох регионнарыгар уматыгынан хааччыллыы боппуруостара төһө да ыараханын иһин, логистика хас да хайысхатынан салгыы аҕалаллар уонна былаан быһыытынан ыытыллаллар.
От ыйын 4 күнүнээҕи даннайынан, өрөспүүбүлүкэҕэ тимир суолунан 397 вагон уматык кэлэр, уопсай кээмэйэ 24 тыһыынчаттан тахса туонна. Манна бэнсиин, дизель уонна авиация уматыга баар. Уматык Саха сиригэр кэллэ да, нефтебазаларга үллэрэн баран, бүтэһик туһанааччыларга тиэрдиллэр.
Тэҥинэн хотугу тиэйии-таһыы чэрчитинэн уматыгы аҕалыы салҕанар, ол ыраах уонна уустук сырыылаах сирдэри хааччыйарга көмөлөһөр.
Эрдэ иһитиннэриллибитинэн, бэс ыйын 24 күнүгэр РФ бырабыыталыстыбатын бэрэссэдээтэлин солбуйааччы Александр Новак салалтатынан федеральнай штаб мунньаҕар Саха сиригэр уматык сүрүн кээмэйэ быһаарыллыбыта. Ылыллыбыт быһаарыылары Арассыыйа Энергетикатын министиэристибэтэ, ньиэп хампаанньалара уонна тырааныспар тэрилтэлэрэ олоххо киллэрэллэр.
Саха сиригэр туруктаах хааччыйыыны уонна ресурсалары тэҥник үллэриини тутуһар сыалтан быстах кэмҥэ сорох сапараапкалыыр ыстаансыйаларга уматыгы биэриигэ хааччахтар киллэриллибиттэрэ. Ол гынан баран социальнай инфраструктура эбийиэктэрин, экстреннай сулууспалары, общественнай тырааныспары, аграрнай салааны хааччыйыы, ону тэҥэ Арктика оройуоннарыгар тиэрдии толору кээмэйинэн ыытыллар.
Уматыгынан хааччыйыы бары кыттыылаахтара суукканы эргиччи эрэсииминэн үлэлииллэр, өрөспүүбүлүкэҕэ тохтоло суох логистиканы уонна туруктаах тиэрдиини хааччыйаллар.
