А.П. Решетникова аатынан Саха сирин норуоттарын музыкаларын уонна фольклордарын музейа «Тропою предков: сохранение и популяризация устных традиций эвенов Момского улуса» бырайыагы олоххо киллэриигэ судаарыстыбаннай өйөбүлү ылла. Музейга иһитиннэрбиттэринэн, бырайыак эбэҥки фольклорун билээччи Мария Корякина ураты нэһилиэстибэтин аудио — видеофикациялааһын көрөр: ырыаларын, остуоруйаларын уонна үгэстэр тустарынан кэпсээннэрин.
Ырыа үс көрүҥүнэн хаачыстыбалаах суруйуулара оҥоһуллуохтара: Мария Корякина бэйэтэ, опера уонна балет тыйаатырын сүрүннүүр солистката Анна Дьячковская, ону тэҥэ оскуола оҕолорун уонна ыччат толоруутугар.
Бырайыак түмүгүнэн аудиозапистарга түргэнник киирэргэ тиэкистэрдээх, ноталаах уонна QR-кодтаах «Ыллыыр хомуурунньугу» таһаарыахтара.
Ону тэҥэ Мария Корякина «Чаамык ньаан һээйэк» («Как сурок Чаамык медведя перехитрил») уонна «Һамакан Өлики» («Сказка о мудром Һамакане и хищной птице Умул») остуоруйаларыгар олоҕуран мультипликационнай киинэлэри оҥоруу былааннанар.
Киэҥ аудиторияҕа сырдатар тэрээһиннэри ыытыахтара: лекциялары, маастар-кылаастары уонна төрүт култуураны илдьэ сылдьааччылары кытта көрсүһүүлэри. Бары матырыйааллары харахтарынан-кулгаахтарынан доруобуйаларыгар хааччахтаах дьоҥҥо анаан адаптациялыыллар.
«Бу бырайыак — эбэҥки норуотун сыаната суох нэһилиэстибэтин харыстааһыҥҥа дьоһун хардыы. Хас биирдии ырыа, хас биирдии остуоруйа — өбүгэлэрбит куоластара, кэлэр көлүөнэлэргэ иһиллиэхтээх», — диэн музейга бэлиэтээтилэр.
Бырайыак партнердарынан Муома оройуоннааҕы кыраайы үөрэтэр музей, И. Н.Егоров-Горнай аатынан өрөспүүбүлүкэтээҕи көрбөттөр уонна мөлтөхтүк көрөллөр анал бибилэтиэкэлэрэ, Адаптивнай үөрэх комплекса, Д.К. Сивцев-Суорун Омоллоон судаарыстыбаннай опера уонна балет театра уонна Ирмино куорат култуура уонна сынньалаҥ киинэ (ЛНР) буоллулар.
Ил Түмэҥҥэ суругар Саха сирин баһылыга Айсен Николаев культурнай-историческай нэһилиэстибэни харыстааһыны өрөспүүбүлүкэҕэ култуура Сылын биир тутаах сыалын быһыытынан бэлиэтээтэ.
