29 Кулун тутар 29.03
  • -12°
  • $ 92,26
  • 99,71

Ленскэй Батамайыгар ньирэй хотоно үлэҕэ киирдэ

11:07, 14 октября 2020
Текст:
Читайте нас на
Яндекс Новости
ЯДВ

Ленскэй улууһун Батамай нэһилиэгэр 700 кв. миэтэрэ иэннээх 200 төбөҕө анаммыт ньирэй хотонун үлэҕэ киллэрдилэр. Хотону 23 мөлүйүөҥҥэ улуус бүддьүөтүн харчытыгар уонна тэрилтэ бэйэтин үбүнэн икки ый иһигэр тутан киллэрдилэр. Саҥа хотон Ленскэй олохтоохторун сылы эргиччи бэйэ этинэн хааччыйар соруктаах. Бу туһунан улуус дьаһалтата иһитиннэрэр.


Манна Мурья нэһилиэгиттэн итиэннэ атырдьах ыйын бүтүүтэ Архангельскайтан кэлбит сүөһүлэр төрүөхтэрэ туруохтара.

Үөрүүлээх тэрээһиҥҥэ сылдьыбыт тыа хаһаайыстыбатын миниистирин солбуйааччы Николай Афанасьев Ленскэй улууһа эһиилгиттэн тыа хаһаайыстыбатын улууһунан буоларын эттэ. «Бэлэмнэнии үлэтэ быйылгыттан саҕаламмыта. Өрөспүүбүлүкэ суотугар Архангельскайтан холмогорскай боруода сүөһү ылыллыбыта. Инникитин улууска оҕуруот аһын үүннэрэр, сылгыны иитэр былааннар бааллар», — диэтэ миниистири солбуйааччы.

Улуус баһылыга Жумарт Абильманов улууска тыа хаһаайыстыбатын сайыннаарыы үлэлэрэ тэтимнээхтэрин эттэ. «Былырыын Бэтинчэ нэһилиэгэр сүөһү хотоно аһыллыбыта. Быйыл Батамайга – ньирэй хотоно. Аныгы тутуулаах хотоҥҥо дьон үөрэ-көтө үлэлиэ. Улууска ынах ыаччылар 70 тыһ хамнастаахтар, механизатордар — 60-65 тыһ. Былаан элбэх, биһиги бэйэбит аспытынан бэйэбитин хааччынарбытын ситиһиэхтээхпит», — диир баһылык.

«Инникитин Нуотара нэһилиэгэр сибиинньэ пиэрмэтэ, Чамчаҕа – көтөр, Орто-Наахараҕа – саҥа хотон, Хотугу Ньүүйэҕэ – тэпилииссэ тутуллара былааннанар. Эһиил сайын 1000 кв.м. иэннээх тэпилииссэ ылар санаалаахпыт. 2022 сылга өрөспүүбүлүкэ бастыҥ тыа хаһаайыстыбатын улууһун аатын ыларга үлэлэһэбит», — диир Жумарт Абильманов.

«Батамайское» ХЭТ дириэктэрэ Николай Ефимов быйыл тэрилтэ үүтү ыаһыҥҥа былаанын 40%, үүт соҕотуопкатын — 50% куоһарбытын кэпсээтэ. От былырыыҥҥытааҕар 30%-нан элбэх оттоммут, сиилэс — икки төгүл элбэх. «Үүт ас былааны таһынан бэлэмнэнэн оҕо саадтарыгар, улуус маҕаһыыннарыгар 40%-нан элбэх бородууксуйаны тиэртибит. Архангельскай сүөһүлэрэ, ньирэй хотоно өлгөм үүтү, сылы эргиччи сибиэһэй бэйэ этинэн хааччыйыахтара«, — диэн дириэктэр санаатын үллэстэр.

Саҥа дьыл иннигэр Батамайга саҥа сыыр оҥорордоох үүт сыаҕа тутуллара былааннанар. Тутууну ньирэй хотонун туппут «Арман» ХЭТ тутуо.

Следите за самым важным и интересным в Telegram-канале и WhatsApp-группе ЯСИА