Саха сиригэр Өлүөнэ муостатын тутуу сүрүн түһүмэхтэрэ 2027-2028 сылларга ыытыллыахтара. Быйыл өрүс төрдүгэр кырата биир коффердам (кураанах үлэ зонатын оҥорорго герметичнай ыстаал конструкция) туруоруллуоҕа, барыта үс буолуоҕа. Бу туһунан республика баһылыга Айсен Николаев бэҕэһээ, муус устар 27 күнүгэр, быһа сибээс кэмигэр кэпсээтэ.
«Сүдү тутуу барар. Коффердамнар — сүүнэ уонна ураты тутуулар. Быйыл биири өрүс төрдүгэр түһэриллиэхтээх, барыта үс буолуохтаах. Билигин муоста тутуутугар 400-тэн тахса киһи, 100-тэн тахса техника үлэлиир», — диэтэ регион баһылыга.
Кини этэринэн, федеральнай үбүлээһин боппуруостара быһаарылыннылар, быйыл өрөспүүбүлүкэтээҕи үбүлээһиҥҥэ боппуруостар бааллар, былырыын бары эбэһээтэлистибэлэр туолбуттар.
«Биллэн турар, Киин баан үрдүк бырыһыаннаах ыстаапката биһигини кыратык тохтотор, бэйэбит чааһынай үп-харчы күүскэ тардылларын улаханнык баҕарбаппыт, тоҕо диэтэххэ, ити кэлин тиһэҕэр өрөспүүбүлүкэ оҥоруохтаах төлөбүрүн сыанатыгар дьайыаҕа. Уопсайынан кыраапык быһыытынан барабыт. Дойду салалтата үлэни хонтуруоллуур», — диэн Николаев иһитиннэрдэ.
Туруоруллубут соруктар бары быһаарыллыахтара диэн эттэ. Иннибитигэр — үлэ улахан кээмэйэ күүтүллэр. Тутуу саамай сүрүн түһүмэхтэрэ 2027 уонна 2028 сылларга саҕаланыахтара, диэтэ баһылык. «Муоста өрөспүүбүлүкэҕэ эрэ буолбакка, бүтүн дойдуга эмиэ наада. Уопсай күүһүнэн саха дьонун үйэлээх баҕа санааларын аны чугастааҕы сылларга толоруохпут диэн эрэнэбин», – диэн Ил Дархан эрэннэрдэ.
Санатан эттэххэ, 2025 сыллаахха Өлүөнэ муостатын «Инфраструктура для жизни» национальнай бырайыакка киллэрбиттэрэ.
