16 От ыйа 16.07
  • 23°
  • $ 87,81
  • 95,78

Кустуурдар Арктика эргимтэтин кыһалҕаларын туһунан бырабыыталыстыбаҕа этиннилэр

16:04, 19 февраля 2020
Текст:
Читайте нас на
Яндекс Новости
ЯДВ

Эбээн-Бытантай национальнай улууһугар Саха Өрөспүүбүлүкэтин ситэриилээх былааһын отчуоттуур бөлөҕө үлэлээтэ. Кустуур, Дьарҕаалаах нэһилиэктэригэр сырыттылар. Дьон санаатын этиннэ.


Кустуур нэһилиэгэр СӨ баайга-дуолга уонна сиргэ сыһыаннаһыы миниистирин солбуйааччыта Виктор Афанасьев салайааччылаах бөлөх сырытта.
Нэһилиэк баһылыга Константин Старостин арыаллаах бөлөх И.Н.Слепцов аатынан орто оскуолаҕа, “Кэнчээри” уһуйааҥҥа, учаастактааҕы балыыһаҕа, “Бытантай” саха ынаҕын иитэр питомникка сылдьан үлэни-хамнаһы билистилэр.

Саха Өрөспүүбүлүкэтин ситэриилээх былааһын 2019 сылга ыыппыт үлэтин нэһилиэнньэ иннигэр иһитиннэрэр мунньахха хоту сир кытыы нэһилиэгин олохтоохторо баар кыһалҕаларын ыйдылар, олох уйгута тупсарын туһугар этиилэрин туруорустулар. Ол курдук, эминэн-томунан хааччыллыы, ыраах сиртэн айан ороскуота ыараханын, “Ростелеком” оҥорор интэриниэт сибээс өҥөтүн иһин төлөбүрэ үрдүгүн, элбэх оҕолоохторго чэпчэтиилэр, национальнай медиссиинэ киинигэр көрдөрүнэргэ унньуктаах уһун уочарат түмүгэр сөптөөх өҥөнү ылбаттарын туһунан, саха ынаҕын иитэр чааһынай дьоҥҥо көмө кээмэйин сөптөөхтүк көрөргө, Арктика эргимтэтин учууталларын өйүүр анал бырагыраама киирэрэ буоллар диэн этиннилэр.

Мунньах кэннэ тус көрсүһүүгэ биирдиилээн дьон ыйытыктарыгар сөптөөх хоруй, сүбэ – ама ыллылар.

СӨ Арктика сайдыытыгар уонна хотугу норуоттар дьыалаларыгар миниистири солбуйааччыта Михаил Погодаев нэһилиэккэ аҕыйах ахсааннаах норуоттар түмсүүлэрин кыттыылаахтарын кытта көрсөн, министиэристибэ ыытар үлэтин билиһиннэрдэ.


Улуу Кыайыы 75 сылынан нэһилиэк ытык кырдьаҕастарыгар 91 саастаах Любовь Ивановна Гороховаҕа, 90 саастаах Христина Егоровна Гороховаҕа ыалдьыттаатылар, махтал сурук уонна өйдөбүнньүк бэлэх туттардылар. Ытык кырдьаҕастар өйдөрө – санаалара ырааһа, дьэҥкэтэ, өрөспүүбүлүкэҕэ буола турар быһыыны – майгыны көрө – истэ, ырыта олороллор. Үрдүк сололоох салайааччыларга ытык кырдьаҕастар ситиһиилээх үлэни, чэгиэн туругу, эйэлээх олоҕу баҕаралларын эттилэр.

Бу бөлөххө СӨ үп миниистирин солбуйааччыта Павел Багынанов, Арктика сайдыытыгар уонна хотугу норуоттар дьыалаларыгар миниистир солбуйааччыта Михаил Погодаев, СӨ доруобуйа харыстабылын миниистирин солбуйааччыта Марина Степанова, улуус дьаһалтатын социальнай политика салаатын салайааччыта Антонина Юмшанова, улууска тыа хаһаайыстыбатын салалтатын салайааччыта Сергей Аликов, экэниэмикэ сайдыытын салалтатын салайааччыта Дмитрий Сыроватскай, үп салаатын салайааччыта Дмитрий Нохсоров, киин балыыһа кылаабынай бырааһа Анатолий Баишев, улуустааҕы култуура салалтатын салайааччыта Степан Слепцов, “Бытантай уоттара” хаһыат кылаабынай эрэдээктэрэ Яна Рожина, социальнай харалта сүрүннүүр исписэлииһэ Любовь Слепцова үлэлээтилэр, диэн суруйар  https://ulus.media

Следите за самым важным и интересным в Telegram-канале и WhatsApp-группе ЯСИА