Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) мандат уонна регламент хамыыһыйатын мунньаҕын Игорь Григорьев салайан ыытта.
Хамыыһыйа чилиэннэрэ Ил Түмэн сэттис ыҥырыытын норуот дьокутаата Николай Николаевич Долгунов боломуочуйатын бигэргэтэр туһунан парламент уурааҕын бырайыагын көрдүлэр. Кини Үөһээ Бүлүү – Горнай 15 №-дээх биир мандааттаах быыбардыыр уокурукка эбии быыбарга кыайда. Быһаарыы бырайыага «Саха Өрөспүүбүлүкэтин Судаарыстыбаннай Мунньаҕын (Ил Түмэнин) туһунан» СӨ Төрүт Сокуонунан оҥоһулунна.
Маны таһынан, мунньахха сэттис ыҥырыылаах парламент сис кэмитиэттэрин састааптарыгар уларытыылары сөбүлэстилэр:
Тыа сирин уонна аграрнай бэлиитикэ кэмитиэтэ: кэмитиэт бэрэссэдээтэлэ Александр Атласов уонна кини солбуйааччыта Валерий Федоров салалталарынан саҥардыллыбыт састаап бигэргэннэ. Кэмитиэккэ 12 норуот дьокутаата киирдэ.
Урбаан уонна туризм кэмитиэтэ: кэмитиэт састааба бэрэссэдээтэл Алексей Корнилов уонна кини солбуйааччылара — Ньургуйаана Заморщикова уонна Татьяна Шарова салалталарынан көннөрүлүннэ.
Николай Долгунов боломуочуйатын бигэргэтэр уонна парламент кэмитиэттэрин састааптарыгар каадыр уларыйыыларын туһунан уураахтар түмүктүүр бырайыактара Ил Түмэн XX (уочараттаах) пленарнай мунньаҕын күннээҕи дьыалатыгар киирдилэр, ол Дьокуускайга алтынньы 21–22 күннэригэр ыытыллыаҕа.
Саха парламент саайтыттан Артур Харбанов тылбаастаата.
