Быйыл, балаҕан ыйыгар Бэрдьигэстээх, Кировскай, Одуну нэһилиэктэрин баһылыктарын, Бэрдьигэстээх, Кировскай, Октябрьскай нэһилиэктэригэр бэрэстэбиитэллээх уорганнарын депутаттарын быыбардара ыытыллыаҕа.
Бэс ыйын 14 күнүгэр, Горнай улууһун түөрт нэһилиэгэр аны күһүн, балаҕан ыйыгар, олохтоох бэйэни салайыныы уорганнарын быыбарыгар “Биир ньыгыл Арассыыйа” баартыйа хандьыдааттарын сүүмэрдиир барыллаан куоластааһын (праймериз) ыытылынна.
Барыллаан куоластааһын түмүгүнэн Бэрдьигэстээх, Кировскай, Одуну нэһилиэктэрин баһылыктарыгар, Бэрдьигэстээх, Кировскай, Октябрьскай нэһилиэктэрин бэрэстэбиитэллээх уорганнарын депутаттарыгар кандидаттар быһаарылыннылар.
«Биир ньыгыл Арассыыйа” баартыйаттан нэһилиэктэр баһылыктарыгар кандидаттарынан буоллулар:
Бэрдьигэстээх нэһилиэгэр Аргунов Алексей Григорьевич, Бэрдьигэстээх нэһилиэгин баһылыгын солбуйааччы;
Кировскай нэһилиэгэр Дьячковскай Егор Егорович, Кировскай нэһилиэгин баһылыга;
Одуну нэһилиэгэр Петров Иван Спиридонович, Одуну нэһилиэгин баһылыга.
Бэрэстэбиитэллээх уорганнарга:
Бэрдьигэстээх нэһилиэгин депутаттарын сэбиэтигэр — 15, Кировскай нэһилиэгин депутаттарын сэбиэтигэр — 11, Октябрьскай нэһилиэгин депутаттарын сэбиэтигэр — 9 депутакка кандидаттарынан киирсэргэ быһаарылыннылар.
Барыллаан куоластааһын ыытыллар учаастактарыгар тэрээһин аһаҕастык, санитарнай эпидемиологическай миэрэлэри тутуһан ыытылларыгар бары усулуобуйа тэрилиннэ. Ааҕар хамыыһыйалар бүлүтүөннэри ааҕан туттардылар.
