29 Кулун тутар 29.03
  • -11°
  • $ 92,26
  • 99,71

Филиппинканы хаайан олорбут кэргэнниилэргэ дьыала тэрилиннэ

12:31, 15 февраля 2017
Текст:
Читайте нас на
Яндекс Новости
ЯДВ

Бу быһылаан быйыл олунньу 10-12 күннэригэр Дьокуускайга буолбута. Отой да биллибэккэ хаалыа эбит, өскөтүн бу түбэлтэҕэ дьоруойдуу быһыыламмыт саха киһитэ Ньюс.якт.ру сайтка сибээскэ тахсан, туох буолбутун суруналыыстарга кэпсээбэтэҕэ буоллар. Бу туһунан edersaas.ru ааҕыҥ.


Холуобунай дьыала тэриллибитин туһунан РФ Силиэстийэлиир кэмитиэтин Саха сиринээҕи управлениета иһитиннэрдэ. РФ Холуобунай кодексатын 127-с ыст. 3-с чааһынан, ол эбэтэр, киһиэхэ ыарахан эчэйиини оҥорон туран көҥүлү быһыы бэлиэтэ баарынан.

Дьыала кэргэннии Кристина уонна Александр Леваднайдарга тэриллибит. Уорбаланааччы дьахтар — «Чистый дом» клининговай компания хотуна, кини эрэ — Дьокуускай куорат полициятын начальнигын солбуйааччы.

Силиэстийэ сабаҕалыырынан, олунньу 10-12 күннэригэр бу кэргэнниилэр Кузьмин уулуссатын биир дьиэтин кыбартыыратыгар Филиппиныттан төрүттээх, дьиэ хомуйааччынан кинилэргэ үлэлии сылдьыбыт дьахтары хоско хаайбыттар, ол эбэтэр, сокуоннайа суохтук кини көҥүлүн быһыыга уорбаланаллар. Силиэстийэ уорбаланааччылар дьайыыларынан «эрдэттэн киксибит бөлөҕүнэн» диэн квалификациялыыр.

Олунньу 12 күнүгэр филиппинка маҥнайгы этээс түннүгүттэн ыстанан куоппут. Ол ыстанаары ыарахан эчэйиилэри ылбыт — сиһин уҥуоҕа тостубут. Билигин кини балыыһаҕа сытар.

Ити суруйуу бэчээккэ тахсаатын, өрөспүүбүлүкэ борокуратуурата бэйэтин бэрэбиэркэтин саҕалаабыта. «Чистый дом» компания үлэ уонна миграция туһунан сокуоннары кэспитин-суоҕун. Бэрэбиэркэ түмүгүнэн, борокуратуура миэрэ ылыаҕа.

…Оттон филиппинка ол ыстанан, массыына тохтотон, урут үлэлии сылдьыбыт дьонун дьиэтигэр — «Японец» маҕаһыын хаһаайына Афанасий Алексеевтаахха — ыйдаран тиийэн быыһаммыт. Афанасий тута полицияны уонна «суһал көмөнү» ыҥырбыт. Ол эрээри, полиция иннинэ бу кэргэнниилэр тиийэн кэлэн, филиппинканы илдьэ бара сатаабыттарын, Алексеев көмүскэһэн, күүстээхтик утарылаһан, дьахтары быыһаан ылбыт.

Онон, туора омук гражданкатын маннык сирэйэ-хараҕа суох атаҕастааһын тугунан түмүктэнэрин олох көрдөрүө.

Следите за самым важным и интересным в Telegram-канале и WhatsApp-группе ЯСИА