НВК САХА — Быйылгы сезонтан саҕалаан «Саха» национальнай көрдөрөр-иһитиннэрэр хампаанньа оҕолорго туһуланар үлэтин күүһүрдүөҕэ. Чуолаан интернет-ситимигэр, ютуб ханаалга оҕолорго аналлаах биэриилэри таһаарыахтара.
Оттон тэлэбиидьэнньэҕэ «Фиксики» диэн аатырбыт мульт-киинэни сахалыы тылбаастанан көстүөҕэ. Саха сирин бириэмэтинэн 12.15 уонна 17.15 чааска буолуоҕа.
Бу туһунан тэлэбиидьэнньэ саҥа сезонугар анаммыт пресс-конференцияҕа биэриилэри бэлэмнээн таһаарар дирекция директора Олег Колесов кэпсээтэ.
«Биһиги хампаанньабыт 56 тыһыынча сурутааччылаах ютуб ханаалыгар анал сулууспа оҕолорго биэриилэри бэлэмниэҕэ. Бу чааһыгар күүскэ үлэлиир былааннаахпыт. Оттон «Фиксики» мульт-киинэ ааптардарын кытта элбэх кэпсэтиини ыытан, көрдөрөр быраап ылан, сахалыы саҥартыбыт», — диэтэ кини.
Оҕолорго аналлаах биэриилэри бэлэмниир айар бөлөх салайааччыта Лена Керемясова бэлиэтээбитинэн мульт-киинэни оҥорорго улахан үлэ ыытыллыбыт. «Мульт-киинэни сахатытарга элбэх кэпсэтии барбыта, барытын ааптардары кытта сүбэлэһэн, көҥүл ылан оҥордубут. Артыыстарбытын кастинынан таллыбыт. Уобараска киирэр кыахтаах оҕолор буолуохтаахтар. Ирдэбил оннук этэ. Ону таһынан, муль-киинэ ырыатын-тойугун, музыкатын биллэр ырыаһыт Алексей Егоров оҥорор. Мульт-киинэлэр оҕону олус элбэххэ үөрэтэллэр», — диир кини.
Сүрүн дьоруой ДимДимыч тылын Айыы кыһатын 6-с кылааһын үөрэнээччитэ Арылхан Лебедев саҥарда.
Бэлиэтээн эттэххэ, «Фиксики» мульт-киинэ 1975 сыллаахха Эдуард Успенскай суруйбут «Гарантийные человечки» остуоруйа-сэһэнинэн суруллубут. Аҕыс саастаах ДимДимыч диэн оҕо тулалыыр эйгэтин үөрэтэрин туһунан.
Источник: http://nvk-online.ru
