«Саха сирин дьахталлара гражданскай көҕүлээһин уонна инникигэ эппиэтинэс иһин» Саха сирин дьахталларын ХIV съеһигэр Мэҥэ Хаҥалас улууһуттан кыттар делегаттар Дьокуускайдааҕы технология уонна дизайн коллеһыгар сырыттылар. Бу туһунан СӨ профессиональнай үөрэхтээһиҥҥэ министиэристибэтин пресс-сулууспата иһитиннэрэр.
Миниистир Михаил Присяжнай съезд кыттыылаахтарын кытта бэйэтэ көрсөн, аныгы дьахтар уопсастыбаҕа оруолун туһунан кэпсэттилэр. Ол кэннэ «Күннээх таба» I көс олохтоох норуоттар икки ардыларынааҕы этническай муода фестивалыгар дьүүллүүр сүбэ үрдүк сыанабылын ылбыт авторскай коллекцияларын устудьуоннар көрдөрдүлэр.
Делегацияҕа колледж устун экскурсия тэрилиннэ. «Художественнай фонд экспонаттарын, устудьуоннар дипломнай үлэлэрин, ойуулуур-дьүһүйэр искусство оҥоһуктарын, сувенирдары олус интэриэһиргээн көрдүбүт. Оҕолор наһаа да талааннаах буолаллар эбит. Араас матырыйаалы холбуу тутан, наардаан олус үтүөнү саҕар, кэрэ оҥоһуктары айан таһааралларын сөхтүбүт. Учууталлар туох баар сыраларын-билиилэрин ууран үөрэтэллэрин хайҕаатыбыт», — дииллэр делегаттар.
Делегаттарга саамай долгутуулаах түгэнинэн маастар-кылаастарга кыттыы уонна бэйэлэрэ оҥорбут сувенирдарын бэлэх тутуу буолла.
