Уу тырааныспарын институтун дьиэтигэр Россия уонна омук дойдуларын үрдүкү үөрэҕин кыһаларыгар өрөспүүбүлүкэтээҕи приемнай хамыыһыйа бүгүҥҥүттэн ыла үлэтин саҕалаата. Үөрэх тэрилтэлэрин кытта сөбүлэһии түһэрсиигэ үлэнэн хаччыйыы сүрүн усулуобуйа буоларын профессиональнай үөрэхтээһин миниистирэ Михаил Присяжнай эттэ.
«Оскуоланы бүтэрээччилэргэ үрдүк таһымнаах үөрэҕи уонна үөрэх кэнниттэн үлэни хааччыйар Россия уонна омук дойдуларын 150 тэрилтэлэрин биһиги таллыбыт», — диэтэ кини.
«Оҕолор дьиэлэриттэн ыраах буолалларынан сибээстээн кинилэр булгуччу уопсай дьиэнэн хааччылаллар. Онтон ол кыаллыбатаҕына, ороскуоту толуйуу барыйаанын толкуйдуубут», —диэтэ кини.
Кэлиҥҥи сылларга техническэй уонна технологическэй эйгэлэр инники күөҥҥэ тураллар.
«Томскай, Новосибирскай уонна Санкт Петербург үөрэхтэрин кыһалара үөрэтэр информационнай технологиялара ордук биһирэнэллэр. Юриспруденцияҕа болҕомто эмиэ улахан. Онон министиэристибэ Ураллааҕы юридическай университекка миэстэлэри биэрэр», — диэн кини эбэн эттэ.
Былырыын ордук биһирэнэр идэлэр ахсааннарыгар манныктар киирбиттэр: «Юриспруденция» (биир миэстэҕэ 10 киһи), «Документоведение и архивоведение. Историко-архивоведение» (биир миэстэҕэ 8 киһи), «Электроэнергетика и электротехника», «Нефтегазовое дело», «Прикладная геология» (биир миэстэҕэ 4 киһи). Быйыл Саха сиригэр дойду үөрэҕин 60 тэрилтэтигэр 900 миэстэ, ол иһигэр аспирантура, магистратура, бакалавриат, специалитет уонна орто профессиональнай үөрэхтээһин бырагыраамалара бэриллибит.
Бүгүҥҥүттэн үлэтин саҕалаабыт өрөспүүбүлүкэтээҕи приемнай хамыыһыйа бэс ыйын 27 күнүттэн от ыйын 4 күнүгэр диэри уу тырааныспарын институтугар үлэлиэҕэ.
