Саха сирин бырабыыталыстыбатын бэрэссэдээтэлэ Кирилл Бычков уонна гражданскай оборуона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистир Дмитрий Лепчиков халаан уутун туругун кэтээн көрөргө Дьааҥы улууһугар тиийдилэр, диэн Саха сирин быыһыыр сулууспатыгар иһитиннэрдилэр.
Бөртөлүөт ардах халааныттан эмсэҕэлээбит нэһилиэнньэҕэ анаан 1565 киилэ гуманитарнай таһаҕас тиэриэртэ. Манна ас-үөл, иһэр уу, гигиена предметтэрэ уонна сылаас маллар бааллар.
Суордаахха кэлээт салайааччылар инфраструктура тутаах эбийиэктэрин — оскуола дьиэтин уонна хочуолунайы көрдүлэр, ону тэҥэ олохтоох дьону кытта көрсүһүү ыыттылар. Миниистир Дмитрий Лепчиков чөлүгэр түһэрэр үлэни ыыта сылдьар быыһааччылары кытта кэпсэттэ.
Эрдэ Дулҕалаахха уона Суордаахха быыһыыр сулууспа биэс быыһааччытын халаан уутун содулун утары охсуһарга көһөрбүттэрэ. Улууска уу таһыма салгыы үрдүүр кутталлаах буолан, нэһилиэнньэни сорохторун эваакуациялааһын ыытылынна. Суһал штаб гидрологическай быһыыны-майгыны түүннэри-күнүстэри кэтээн көрүүтүн салҕыыр, миэстэтигэр быстах кэмҥэ олорор пууннар бааллар. Олох-дьаһах эбии таһаҕаһын тиэрдии үлэтэ салҕанар.
