Бүгүн Чурапчы улууһугар физкултуура уонна успуорт үнүстүүтэ тэриллибитэ 20 сыла. Үөрүүлээх күнү суолталаан, Арассыыйа успуордун миниистирэ Павел Анатольевич Колобков Саха сирин ыспартыыбынай томторугар ыалдьыттаан, үлэни-хамнаһы кытта билистэ.
Арассыыйа успуордун миниистирэ Павел Колобков уонна Ил Дархан Айсен Николаев Чурапчыга кэлбиттэрэ — улууспут успуорт туоната буоларын өссө биирдэ бигэргэтэр.
Павел Колобков 200 миэстэлээх, 100 киһини аһатар остолобуойдаах, бу сотору үлэҕэ киириэхтээх саҥа уопсайы көрдө. Салгыы олимпийскай эрэллэри бэлэмниир интэринээт-оскуоланы уонна федеральнайдааҕы успуорт үнүстүүтүгэр сырытта.
Биир сүрүн суолталаах түгэнинэн Саха Өрөспүүбүлүкэтин уонна РФ успуордун министиэристибэтин икки ардыларыгар сөбүлэҥи түһэрсии буолла. Сөбүлэҥ ис хоһооно – өрөспүүбүлүкэҕэ физическэй култуура уонна успуорт сайдыытыгар бииргэ үлэлэһии. Манна туспа пуунунан үнүстүүт инники сайдыытын торумугар салгыы үлэлэһии киирэ сылдьар: эбии биир уопсайы, единоборство киинин тутуу курдук боппуруостар.
Павел Колобков, Айсен Николаев суруналыыстарга биэрбит интервьюларыгар бу үнүстүүт дойду үрдүнэн холобур буоларын, инникилээҕин бэлиэтээтилэр уонна үөрэх кыһата инники сайдыытыгар үлэлэһэргэ бэлэмнэрин эттилэр.
Ааптар: Елена МАКАРИНСКАЯ, Чурапчы улууһа
