Чурапчы улууһугар олохтоох салайыныыны тэрийии уопсай принциптэрин туһунан сокуон барылын дьүүллэстилэр. Тэрээһиҥҥэ Саха сирин баһылыгын уонна бырабыыталыстыбатын дьаһалтатын олохтоох салайыныы боппуруостарыгар департаменын салайааччытын солбуйааччы Владимир Птицын, ону тэҥэ муниципальнай оройуон депутаттарын сэбиэтэ, нэһилиэктэр баһылыктара кыттыыны ыллылар, диэн улуус дьаһалтатын пресс-киинэ иһитиннэрдэ.
«Чурапчы улууһугар депутаттар уонна нэһилиэктэр баһылыктара, уопсайынан, субъектар уонна муниципальнай уокуруктар боломуочуйаларын таарыйар боппуруостары дьүүллэһиигэ көхтөөхтүк кытыннылар», — диэтэ улуус баһылыга Степан Саргыдаев уонна сокуон барыла муниципалитеттар үлэлэрин көдьүүһүн үп өттүнэн үрдэтэр уонна дойду туруору былааһын күүһүрдэр сыаллааҕын бэлиэтээтэ.
Кини санаатынан, муниципалитеттар икки таһымнаах салайар структураларын суох гыннахха, эппиэтинэһи бэйэ бэйэлэригэр халбарытар кыахтара суох буолуоҕа. Бу сокуон нэһилиэнньэ олоҕун хаачыстыбатын тупсарыаҕа. Сокуон ылыллыннаҕына олохтоохтор муниципальнай салалта үлэтин хонтуруоллуохтарын сөп буолуоҕа, онон нэһилиэк олоҕор дьон көхтөөхтүк кыттыһыаҕа гражданскай хонтуруол диэн баар буолуоҕа.
