В.Ларионов аатынан Майа орто оскуолатын төрүт култуураҕа учуутала Дорхоон Дохсун 2015 сылтан «Боотур Омооно» диэн күөн күрэһи саҕалаабыта. Ол эбэтэр, күрэһи чөл олоҕу тарҕатар «Төлкө” эр дьон уопсастыбыннай тэрилтэ, И.М.Романов аатынан Төхтүр орто оскуолатын “Улуу Ил” тэрээһин бырагыраамаларыгар киллэрбитэ.
Дорхоон өбүгэ үөрэҕиттэн төрүт хамсаныыларга олоҕурбут күрэс балаһыанньатын 5,6,7-с кылаас уолаттарыгар сөп түбэһиннэрэн оҥорбута. Онон, бу күрэс добдурҕа кэмигэр айылҕаҕа ыытыллара уолаттарга эт-сиин, үтүө өй-санаа үөскүүрүгэр, түмсүүлээх, тэрээһиннээх буола улааталларыгар көмөлөөх.
“Арчы дьиэтэ” фольклорга методиһа Анна Холмогорова иһитиннэрбитинэн, быйылгы күөн күрэскэ 12 хамаанда кытынна. Күөн күрэс Суола үрэх үрдүгэр турар оскуола базатыгар Пионерскай аппаҕа ыытылынна. Мындыры, сымсаны эрэйэр күрэс түһүмэхтэригэр уолаттар эрбии биитин курдук эристилэр, хас биирдии бөлөх бастыыр туһугар сыратын-сылбатын биэрэн туран күрэхтэстэ. Уопсай түмүгүнэн: бастакы миэстэ – Майа орто оскуолата-1, иккис – Бүтэйдээх, үһүс Балыктаах оскуолалара буоллулар.
Кыайыылаахтарга “Төлкө” эр дьон түмсүү кубоктарын туттардылар. Анал ааттарга: «Сылбырҕа Боотур» – Сережа Яковлев (Наахара), «Сымса Боотур» – Алеша Петров (Балыктаах), «Бэргэн Боотур» – Володя Попов (Бүтэйдээх), «Дьолуо Боотур» – Илья Свинобоев (Матта), «Моду Боотур» – Эрик Китаев (Төхтүр) уонна Тиэлиги бөлөҕө «Түмэн Боотур» анал ааттарга тигистилэр.
«Бу күрэс кэҥииригэр “Төлкө” эр дьон түмсүүтүн кыттыылаахтара, сахалыы тыыннаах дьоммут И.И. Румянцев, Дорхоон Дохсун улахан оруоллаахтар. Маннык үлэ уол оҕо дьиҥнээх сахалыы сиэринэн-майгытынан ис кыаҕын салайынарыгар, олоххо оннун буларыгар көмөлөөх. Былыргы дьыллар быралыйар мындааларыттан, урукку сыллар улаҕаа өттүлэриттэн кутунан-сүрүнэн бэриллэр өбүгэбит үгэһэ олохтоно турдун», – диэн Анна Холмогорова санаатын үллэһиннэ.
