Саха Өрөспүүбүлүкэтин Ил Дархана Айсен Николаев ыам ыйын 26 күнүгэр национальнай бырааһынньыкка бэлэмнэнии туһунан тэрийэр хамыыһыйа мунньаҕын ыытта. 2026 сылга киэҥ ыҥырыылаах Олоҥхо ыһыаҕа Кэбээйи улууһугар буолуоҕа.
«Бырааһынньыкка диэри биир ыйтан ордук кэм хаалла. Биһиги түмүктүүр түһүмэххэ киирдибит. Ыраах сыталларын уонна логистика уустуктарын аахсыбакка, биһиги Ыһыаҕы үрдүк таһымнаахтык ыытыахпыт. Барыта улуус уонна Кэбээйи сэлиэнньэтин олохтоохторуттан улахан тутулуктаах. Итэҕэйэбин, биһиги бары бииргэ өрөспүүбүлүкэ бүттүүнүгэр улахан бырааһынньыгы оҥоруохпут», — диэн бэлиэтээн эттэ Айсен Николаев.
Сиэр-туом, күрэхтэһии уонна успуорт тэрээһиннэрин ыытарга 15 регламеннаах эбийиэги тутуу ирдэнэр. Бырабыыталыстыба бэрэссэдээтэлин солбуйааччы Сергей Местников иһитиннэрбитинэн, үс эбийиэк номнуо бэлэм, уопсай тутуу бэлэмэ — 74%.
Айсен Николаев сорудаҕынан, бэс ыйын 15 күнүгэр диэри бары тутуу үлэтэ түмүктэниэхтээхтэр. Кини ордук болҕомтону тырааныспарынан тиийиигэ уурарга соруйда, ол курдук, Сэбээн-Күөл курдук саамай ыраах сытар нэһилиэк олохтоохторо тиийиэхтэрин наада.
Бырааһынньык бырагыраамата байытыллан, Кэбээйи улууһун бары култууратын араас көрүҥүн, хотугу төрүт аҕыйах ахсааннаах норуоттар үгэстэрин көрдөрүө диэн бэлиэтэннэ.
Кыттааччылары сэттэ эбийиэккэ уонна мобильнай балааккаларга олохтуохтара. Тэрээһинэ суох ыалдьыттарга балаакка куората үлэлиэҕэ. Аһылыгы үс социальнай эбийиэк базатыгар тэрийиэхтэрэ. Саха Өрөспүүбүлүкэтин Ил Дарханыгар иһитиннэрбиттэринэн, биир кэлим оператор талыллыбыт, урбаанньыттарга үөрэтэр сэминээр ыытыллыбыт. Бүгүҥҥү күҥҥэ атыыны тэрийиигэ 22 сайаапка киирбит.
Олохсуйар сирдэргэ уонна тэрээһиннэр буолар миэстэлэригэр мэдиссиинэ уонна аптека пууннара, ону сэргэ быстах кэмнээх суол мэдиссиинэтин пууна үлэлиэхтэрэ. Уһун Хонуу сиригэр киэҥ балаһалаах интэриниэккэ холбонуу хааччыллыа. Маныаха базовай ыстаансыйаны тутарга учаастак бэриллибит.
Аһыллыы уонна сабыллыы сиэригэр-туомугар Кэбээйи оройуонун 1250 олохтооҕо, ону таһынан Намтан, Горнайтан, Үөһээ Бүлүүттэн уонна Бүлүүттэн айар кэлэктииптэр кыттыахтара.
Санаттахха, 2026 сыл Арассыыйаҕа Норуоттар сомоҕолоһууларын сылынан, оттон Саха сиригэр — Култуура сылынан биллэриллибитэ.
