Биллиилээх судаарыстыбаннай диэйэтэл, өрөспүүбүлүкэни 17 сыл устата салайбыт, Саха сирин бүттүүнэ киэн туттар биир саамай чулуу киһитэ Гавриил Иосифович Чиряев төрөөбүт бэлиэ күнэ муус устар 4 күнүгэр Бүлүү улууһугар ыытылынна.
Гавриил Иосифович Чиряев аатын 1983 сылтан чиэстээхтик сүгэр Бүлүүтээҕи 1 нүөмэрдээх орто оскуолаҕа үтүө үгэс быһыытынан кини төрөөбүт күнүн көрсө кылаас чаастара, араас куонкурустар ыытыллаллар. Оскуола киэҥ тэлгэһэтигэр көстүүлээх сиргэ турар Г.И.Чиряев скверигэр үөрэнээччилэр, учууталлар миитиҥҥэ муһуннулар.
Миитини оскуола дириэктэрэ Валентина Семеновна Степанова киирии тылынан саҕалаата. Ол кэнниттэн оройуон Сэбиэтин бэрэссэдээтэлэ Гаврил Семенович Корякин Г.И.Чиряев олоҕун, үлэтин билиһиннэрдэ, оҕолорго, ыччакка туһаайан кини аатын куруутун чиэстээхтик сүгэллэригэр бигэтик эрэнэрин биллэрдэ.
Бүлүү куоратын баһылыга Нюргустан Владимирович Афанасьев бэйэтин этиитигэр аныгы ыччат бырамыысыланнас салаатын идэлэригэр үөрэнэн, төрөөбүт дойдуларыгар туһалаах дьон буола улааталларыгар, Г.И.Чиряев аатын сүгэр тапталлаах оскуолаларын чиэһин үрдүктүк туталларыгар баҕа санаатын тириэртэ. Салгыы оскуола үөрэнээччилэрин аатыттан 11 кылаас туйгун үөрэнээччитэ, Бүтүн Россиятааҕы олимпиада муниципальнай этабын 11 предмеккэ кыайыылааҕа, биллиилээх суруналыыс, СӨ судаарыстыбаннай бириэмийэтин лауреата Николай Крылов бириэмийэтин лауреата Ангелина Дедюкина тыл эттэ.
Гавриил Иосифович үтүө аатыгар сүгүрүйүү, махтаныы бэлиэтигэр кини пааматынньыгар күөх харыйа гирляндатын уурдулар, бары хаартыскаҕа түстүлэр. Бүлүү махталлаах дьоно- сэргэтэ, инникитин элбэҕи эрэннэрэр кэскиллээх ыччата биллиилээх судаарыстыбаннай диэйэтэл, биир дойдулаахтара Г.И.Чиряев аатынан куруутун киэн тутталлар, диэн суруйда Николай Федоров https://www.instagram.com/oloh_suola/
