Бүгүн, олунньу 12 күнүгэр, уһулуччулаах судаарыстыбаннай уонна бэлитиичэскэй диэйэтэл, Саха судаарыстыбаннаһын тэрийсибит чулуу биир дойдулаахпыт Исидор Никифорович Барахов төрөөбүтэ 127 сылын бэлиэтиибит.
Бүтүн саха норуотун инники дьылҕатын, сырдык олоҕун түстээбит, өрөспүүбүлүкэ экэниэмикэтэ, чуолаан бырамыысаланнас сайдыытыгар ураты кылааты киллэрбит улуу киһибит төрөөбүт күнүн бэлиэтээммит, кини хорсун быһыылаах сүдү кылаатыгар, олорон ааспыт чаҕылхай олоҕор сүгүрүйэбит.
Исидор Барахов баара суоҕа 24 эрэ сааһын ааһан баран Саха Сирин автономиятын төрүттэспитэ. Кини таһаарыылаах үлэтэ, мындыр өйө, хорсун быһыыта, уоттаах-төлөөннөөх сүрэҕэ ыччаттарбытыгар холобур буолар. Аныгы ыччат олоххо ураты көрүүлээх, сайдыылаах, киэҥ билиилээх. Онон ыччаттарбыт Исидор Бараховы холобур оҥостон дойдубут сайдыытыгар бэйэлэрин умнуллубат, чаҕылхай хардыыларын оҥоруохтара диэн эрэнэбит.
Исидор Барахов саха норуотун көҥүл санаатын чаҕылхай бэлиэтэ буолар. Кини модун аата саҥа кыайыылары ситиһэрбитигэр иэйиини аҕаллын, көмө буоллун, суруйда T.me/ValeriNikolaev
