Үгүс дойдуга бүгүн — ыам ыйын 25 күнүгэр сүппүт оҕолор күннэрин бэлиэтииллэр. Бу даата АХШ историятыттан саҕаланар, күн бэлиэтинэн халлаан күөҕэ өҥнөөх сир симэҕэ сибэкки буолар.
Бу күн 1979 сыллаахха Америкаҕа алта саастаах оскуола оҕото Эвиан Пейтс сүтэр, кинини бүтүн аан дойду дьоно көрдүүллэр, дьыала киэҥник тарҕанар уонна аатырар да, ити эрээри ситиһиинэн түмүктэммэт.
4 сыл буолан баран, АХШ бэрэсэдьиэнэ Рональд Рейган ыам ыйын 25 күнүн сүппүт оҕолор национальнай күннэринэн биллэрбитэ. Онтон 1984 сыллаахха сүппүт уонна түүрэйдэнэр оҕолору көрдүүр национальнай киин тэриллибитэ (National Center for Missing and Exploited Children, NCMEC).
Сүппүт оҕо — аан дойду таһымнаах иэдээн. Хас биирдии төрөппүт саамай куттанар түбэлтэтэ буолар. Бу күнү бэлиэтээһин дьон-сэргэ болҕомтотун баар кыһалҕаҕа тардар.
“Саха сиригэр ааспыт сылга сокуоннай саастарын ситэ илик оҕолор сүппүттэрин туһунан 124 иһитиннэрии киирбит, оттон 2021 сылга – 178. Биир оҕоттон ураты бары булуллан, дьиэ кэргэннэригэр төннүбүттэр эбэтэр реабилитационнай кииҥҥэ киирбиттэр. Быйыл оҕо сүппүтүн туһунан 47 иһитиннэрии киирбит, онтон 43-һэ Дьокуускайга. Сүппүт оҕолор көстүбүттэр, сорохторун дьыала тэриллиэн иннинэ булбуттар. Холобур, оҕолор чугастааҕы оонньуур былаһааккаҕа баран хаалаллар”, — диэн Саха сиринээҕи ИДьМ пресс-сулууспата СИА-ҕа кэпсээтэ.
