Анаабыр улууһун дьаһалтатын планеркатыгар баһылык Эдуард Платонов баһылык бастакы солбуйааччытынан Дьокуускай куораттан ананан кэлбит, экономист үөрэхтээх Василий Григорьевич Поскачины билиһиннэрдэ.
Салгыы биэс буолан байыаннай дьайыыга сулууспалыы сылдьар уолаттарбытын хайдах тиийэн көрсүбүттэрин, эми-тому, саха быһахтарын, ичигэс таҥастары, дьонноруттан илии тутуурдаах тиийбиттэрин кэпсээтэ. Уолаттар этэҥҥэ сылдьаллар эбит, өйөбүллэрин иһин махталларын тиэрдибиттэр.
Эдуард Петрович «Анаабыр алмаастара», «Ростелеком» бас тэрилтэлэригэр сылдьан дьыалабыай кэпсэтиилэри ыыппыттар.
Баһаартан куттал суох буолуутугар сэрэтии үлэни күүһүрдэргэ, тэрилтэлэр салайааччылара бензин, уматык өттүгэр дуогабардаһан үптэрин эрдэттэн ыыталларыгар, нэһилиэк иһигэр баар кыһалҕалаах хаһаайыстыбаннай боппуруостарга ыйыы-кэрдии биэрдэ.
Улуус үөрэҕин салалтатын начальнига Туяра Гуляева, улуус культуратын управлениетын начальнига Надежда Слепцова бу нэдиэлэҕэ ыытыллар тэрээһиннэри билиһиннэрдилэр.
Олунньу 27 күнүгэр СӨ айылҕа харыстабылын миниистирин эбээһинэһин толорооччу Перфильев Евгений Андреевич салайааччылаах 9 киһилээх делегацията СӨ судаарыстыбаннай ситэриилээх былааһын нэһилиэнньэҕэ отчуоттуу кэлиэхтэрэ.
Источник: «Анаабыр уоттара» хаһыат телеграм-ханаала
