Амма Сулҕаччытын оскуолатын үөрэнээччитэ, өрөспүүбүлүкэ бастыҥ спортсмена Николай Максимов бу сылы ситиһиилээхтик саҕалаата. Үүммүт сылга Башкортостаҥҥа, Камчаткаҕа биатлоҥҥа ыытыллыбыт күрэхтэһиилэргэ кыһыл көмүс мэтээллэри кэттэ.
Амма Сулҕаччытын оскуолатын үөрэнээччитэ, өрөспүүбүлүкэ бастыҥ спортсмена Николай Максимов бу сылы ситиһиилээхтик саҕалаата. Ааспыт сыл олунньу ыйыгар Сахалиҥҥа спорт кыһыҥҥы көрүҥнэригэр аан маҥнай ыытыллыбыт норуоттар икки ардыларынааҕы бастакы «Азия оҕолоро» спортивнай оонньууларга биатлоҥҥа иккис миэстэ буолан, Саха сирин хамаандатыгар үрүҥ көмүс мэтээли аҕалбыта.
Кулун тутар ыйга хайыһарга Саха сирин Кубогын иһин ыытыллыбыт өрөспүүбүлүкэтээҕи күрэхтэһиигэ, муус устар ыйга Алдан куоракка Николай Буслаев аатыгар ыытыллыбыт бүтүн Арассыыйатааҕы күрэхтэһиигэ 20 км марафоҥҥа өрөспүүбүлүкэ кыайыылаахтарынан, балаҕан ыйыгар Саранскай куоракка сайыҥҥы биатлоҥҥа Арассыыйаҕа бастыыр иһин күрэхтэһиигэ иккис призер буолбута.
Спортка үрдүк ситиһиилэрин иһин «Саха – Азия оҕолоро» норуоттар икки ардыларынааҕы фонда лауреата, сыл түмүгүнэн Амма улууһун «2019 сыл бастыҥ спортсмена» ааттары ылбыта.
Бу сылга Уфа куоракка тохсунньу ыйга биатлоҥҥа ыытыллыбыт күрэхтэһиигэ Башкирия өрөспүүбүлүкэтин чөмпүйүөнэ буолан, олунньу ый саҥатыгар биатлоҥҥа Камчаткаҕа ыытыллыбыт Уһук Илин федеральнай уокурукка Арассыыйа үөрэнээччилэрин спартакиадатын иккис түһүмэҕэр бастыыр иһин күрэхтэһиигэ 6 км бастакы миэстэ буолан кыһыл көмүс мэтээллэри кэттэ. Аны кулун тутар ыйга Арассыыйа финалыгар Уһук Илин чиэһин көмүскүөҕэ.
Алексей Никифоров, бастакы тренерэ, учуутала, Сулҕаччы оскуолатын дириэктэрэ: «Бу кыһын оскуолабыт 125 сыллаах үбүлүөйүн бэлиэтээтибит. Маныаха кылааттарын киллэрбит үлэһиттэрбитин, үөрэнээччилэрбитин сэргэ Коля оскуолатын историятыгар дьоһун бэлэҕин оҥордо. 11 кылаас үөрэнээччитэ буоларын быһыытынан быйыл киниэхэ биир кэлим судаарыстыбаннай эксээмэннэри туттарар, тургутууну ааһар, ситии – хотуу аттестатын ылар олус эппиэтинэстээх сыла буолар. Коля спордунан идэтийэн дьарыктанар баҕалаах, онон талыахтаах идэтин спорду кытта сибээстиир бигэ соруктаах. Сыл устата буолар дьарыктар, күрэхтэһиилэр быыстарыгар үөрэнэн, ирдэнэр хонтуруолунай үлэлэрин, эксээмэннэрин туттарыахтаах. Үөрэҕин тэҥэ Арассыыйа финалыгар кыттыахтаах, быйыл буолуохтаах Саха сирин норуоттарын кыһыҥҥы спартакиадатыгар улуус чиэһин көмүскүөхтээх. Спортка маннык үрдүк кылаастаах оҕолор үөрэнэллэрэ олус уустук. Оттон үөрэх ирдэбилэ барыларыгар биир уонна олус кытаанах. Дьулуурдаах эрэ оҕо спортка үрдүк көрдөрүүнү ситиһэр. Онон Колябыт ити курдук бэйэтин дьаныарынан үөрэҕин ситиһиилээхтик түмүктүө диэн эрэнэбит».
Ааптар: Алтана Артемьева, https://ulus.media/2020/02/03/amma-biatloni-a-nikolaj-maksimov-u-uk-ilin-ch-mp-j-ne-buolla/
