Амма кииннэммит библиотекатыгар Бүтүн Россиятааҕы «Библионочь-2016» олус интэриэһинэйдик буолан ааста. Аан бастакы электроннай библиотека сүрэхтэннэ.
Оҕолуун улаханныын бары кыттыыны ыллылар. Библиотекардар бэйэлэрин оҥоһуктарын быыстапката, саха поэттарын хоһоонун ааҕыы, маастар-кылаастар дьон көҕүн тартылар.
«ЛитРес» диэн Россиятааҕы электроннай библиотеканы сүрэхтээһин буолла. Маннык библиотека тыа улуустарыгар сонун көстүү. Ааҕааччы аныгы технологиянан туһанан 750000 араас кинигэни ааҕыан сөп, мантан 25000-та босхо туһаныыга бэриллэр.
Маны сэргэ юристар уонна исписэлиистэр викторинаҕа күрэхтэстилэр. Төрөөбүт дойдуга таптал, Саха сирин историятын билии, улуу дьонунан киэн туттуу тула ыйытыылар бааллар. Тыҥааһыннаах киирсии кэнниттэн 15:8 ахсаанынан исписэлиистэр кыайыылааҕынан таҕыстылар.
