Айсен Николаев чэппиэргэ Саха Өрөспүүбүлүкэтин баһылыгын дуоһунаһыгар кандидат дастабырыанньатын ылла.
«Маннык эппиэтинэһи сүгэрбиттэн, төрөөбүт өрөспүүбүлүкэбэр уонна кини олохтоохторугар элбэх үтүөнү оҥорор кыах үөскээбититтэн долгуйдум. Быыбар иннинээҕи хампаанньа мин үгэс буолбут графикпар хайдах да сабыдыаллаабат, элбэх үлэ күүтэр. Өйөбүлгүт иһин барыгытыгар махтанабын — бу миэхэ олус күндү»,-диэн Айсен Николаев телеграм ханаалыгар суруйда.
Санатан эттэххэ, Айсен Николаев 2018 сыл ыам ыйыгар Саха сирин баһылыгын эбээһинэһин толорооччутунан анаммыта. Ол сыл балаҕан ыйыгар 71,4% куолаһы ылан, регион баһылыгынан талыллыбыта.
Саха сирин баһылыгын быыбара үс күн устата — балаҕан ыйын 8, 9, 10 күннэригэр ыытыллыаҕа. Ону тэҥэ, бу күннэргэ Саха дьоно Ил Түмэн депутаттарын, бэрэстэбиитэллээх уорганнары уонна Дьокуускай куорат Дууматын баһылыктарын талыахтара.
