Сахалар муус устар 27 күнүгэр «Восточнай» космодромтан ракета көтүүтүн туоһуларынан буолуохтара. Роскосмос ыҥырыытынан, делегация бу тэрилтэ эбийиэктэригэр сылдьыаҕа, ракета көтүүтүн кэтээн көрүөҕэ. Тэрээһиҥҥэ Россия президенэ Владимир Путин кэлиэхтээх. СИА корреспондена Галина Мозолевская бэлиэ күнтэн быһа репортаж оҥоруоҕа.
«Уһук Илиҥҥэ баар космодромтан ракета көтүүтүн көрөр дьоллоох түгэн тосхойдо. Маныаха туох бырагыраама бэлэмнэммитэ билиҥҥитэ биллибэт. Ону долгуйа күүтэбит», — диэн СИА-ҕа делагация салайааччыта Ил Түмэн вице-спикерэ Анатолий Добрянцев эттэ.
Делегация састаабыгар айылҕа харыстабылын миниистирин солбуйааччы Яков Сивцев, сибээс миниистирин бастакы солбуйааччы Николай Гришаев, Бүлүү улууһун баһылыгын солбуйааччы Андрей Лобашев, В.Ларионов аатын сүгэр ФТЛ үөрэнээччитэ Владислав Сафонов, Уһук Илиҥҥэ Саха сирин бастайааннай бэрэстэбиитэлин солбуйааччы Геннадий Жирков бааллар.
Москва бириэмэтинэн 05.01 чааска сэттэ кэтээн көрөр пууннартан мустубут дьон ракета көтүүтүн көрүөхтэрэ. «Союз 2.1а» ракета орбитаҕа үс космическай аппарааты таһаарар: «Михайло Ломоносов» чинчийэр спутник, «АИСТ2Д» космическай аппараат уонна SamSat-218 наноспутник.
Ракета көтөр траекторията Саха сиринэн ааһар. Ракета икки туллан түһэр чаастара Саха сирин икки оройуонугар түһүөхтээхтэр. Ити оройуоннарга Роскосмос бэрэстэбиитэллэрэ үлэлии сылдьаллар. Ракета чаастарын тута булан суох оҥоруохтаахтар. Кинилэри таһынан ЫБММ үлэһиттэрэ уонна экологтар онно үлэлииллэр.
