2025 сылга Ытык Таатта килбэйэр киинигэр национальнай спорт көрүҥнэригэр XXII «Манчаары оонньууларын» спартакиадатын көрсө араас хайысхалаах үлэ ыытыллар.
Ол сүнньүнэн Таатта нэһилиэгин дьаһалтатын аактабай саалатыгар тэрилтэ, түөлбэ салайааччыларын ыҥырыылаах Сүбэ мунньаҕын нэһилиэк баһылыга Егор Павловиилээн-саҕалаан ыытта.
Бастакынан Таатта нэһилиэгин баһылыга «Манчаары оонньууларыгар» бэлэмнэниигэ ыытыллыбыт былааннаах үлэлэри сырдатта. Ол курдук благоустройствоҕа улахан хабааннаах Уһук Илиҥҥи бэдэрээлинэй уонна олохтоох бэйэни салайыныыга бэйэ көҕүлээһинин өйүүр ППМИ (Программа поддержки местных инициатив) бырагыраамаларынан, анал бырайыак куонкурустарыгар тиһиктээх үлэ ыытыллыбытын сырдатта.
Мунньахха олохтоох нэһилиэнньэ олорор сирин саҥардыыга бэйэтин тус куолаһын биэрэн, куонкурус түмүгүнэн быһаарыллар үлэ үтүө түмүктээх буолара бэлиэтэннэ. Куоластааһын хас биирдии нэһилиэк олохтооҕуттан тутулуктааҕа биллэр суол. Киэҥ хайысхалаах бырагыраамалар нэһилиэнньэ уйгутун тупсарыыга улахан көмөлөөҕүн толору өйдөөн туран хас биирдии нэһилиэк олохтооҕо көхтөөх кыттыыны ылыахтаах.
Бу бырагыраамалар көмөлөрүнэн Таатта улууһун киинигэр Мординов, Амгинскай уулуссаны саҥардыы, сырдатыы, Ленин уулуссатыттан Куула муостатыгар диэри аспаалы тэлгэтии, тратуардары тэлгэтии, Пекарскай уулуссаҕа ППМИ бырагырааматынан муостаны оҥоруу о.д.а. үлэ ыытыллара былааннанар.
Ону таһынан Сүбэ мунньахха тэрилтэлэр сыһыарыылаах территорияларын ырааһырдыы, хаарбах туруктаах тутуулары көтүрүү, тэрилтэ тас көстүүтүн тупсарыы, күрүөнү саҥардыы, сибэккилэринэн киэргэтии былааннаах үлэтэ көрүлүннэ.
Хомойуок иһин, бэриллибит бириэмэҕэ тэрилтэ салайааччылара анал территорияны тупсарыыга үлэ былаанын күн бүгүнүгэр диэри тиксэрэ иликтэрэ бэлиэтэннэ.
Тэрилтэ, түөлбэ салайааччылара Ытык Күөлгэ киириигэ баар хаппыт мастары, тырааныспартан хаалбыт тимир тобохторун ыраастааһын, баннердарыы, полисадниктары тупсарыы, иҥнэйбит остуолбалары саҥардыы, пилорамалары, ыалдьыттары аһатар кафелары кытары үлэ былаанын туһунан ыйытыылары биэрдилэр. Сүбэ мунньахха улахан таһымнаах күрэһи ыытарга тас көстүүнү тупсарыыга күүстээх үлэ ыытыллыахтааҕа ирдэнэрэ бэлиэтэннэ.
Нэһилиэк баһылыга улуус киинин көҕөрдүүгэ Тааттатааҕы Ойуур хаһаайыстыбатын кытары дуогабар быһыытынан мас олордуутугар үлэ барыахтааҕын уонна кэлэр нэдиэлэҕэ тэрилтэлэринэн куоластааһыҥҥа үлэ ыытылларын иһитиннэрдэ.
Ааптар: Мария Павлова, Таатта хаһыат
