Муус устар 28 күнүгэр «Восточнай» саҥа космодромтан «Союз-2» ракета Саха сирин бириэмэтинэн 11 ч 01 мүн. көппүтэ. Дьиҥэр, былаан быһыытынан 27-с чыыһылаҕа көтүөхтээҕэ. Ити эрээри техническэй төрүөтүнэн тардыллыы бэлиэтэммитэ.
Бүлүү улууһун Үгүлээт, 2-с Күүлэт нэһилиэктэрин сирдэригэр ракета иккис сүһүөҕэ түспүтүн кэнниттэн, СӨ бэрэссэдээтэлин бастакы солбуйааччы- тыа хаһаайыстыбатын уонна аска-үөлгэ потикатыгар миниистир Петр Алексеев салайааччылаах бөлөх көтүүнү оҥорбута. “Көтүү сүрүн сыалынан ойуурга баһаар турбатаҕын көрүү уонна анал дааннайдары хомуйуу», — диэтэ салайааччы.
Бүгүн сарсыарда эбиэккэ диэри Үгүлээт уонна 2-с Күүлэт нэһилиэктэригэр тобох үлтүркэйдэрэ түһүөн сөптөөх сирдэринэн сылдьан пробалары ыллылар уонна аэрофото-устууну оҥордулар. Ити устуу түмүгүн Бүлүү куоракка баар радарнай комплекс ракета тобохторо түһүүтүн «суруммут» дааннайдарын кытта тэҥнээн, үлтүркэйдэр ханна сытар туочукаларын быһаардылар. Ол курдук 17 фрагмент сытар туочукатын чуолкай биллилэр. Саамай чугас 2-с Күүлэт нэһилиэгиттэн 44 км ыраах сытар. Оттон саамай ыраахтар 100 км кэриҥэ тэйиччи түспүттэр.
Сарсын 10 ч. 30 мүн. бастакы рейсинэн экологтар айылҕаттан ыла илик сирдэриттэн эбии проба ылыахтара, эбиэт кэннэ иккис рейс фрагменнары көрдүү көтүөҕэ.
Санатар эбит буоллахха, ракета маҥнайгы сүһүөҕэ Амур уобалаһыгар, спутник сабыыта Алдан, Өлүөхүмэ оройуоннарын уонна иккис сүһүөх Бүлүү, Эдьигээн, Үөһээ Бүлүү улуустарын сиригэр-уотугар түстүлэр.
