Саха сирин норуоттарын VIII спортивнай оонньуулара Саха АССР 100 сылыгар ананар. Уус Алдан улууһугар ыытыллар дьаһаллары көрсө миэстэтигэр социальнай суолталаах эбийиэктэр тутуллаллар. Элбэх хайысхалаах доруобуйаны тупсарынар спортивный комплекс, единоборство саалата уонна Мүрү нэһилиэгэр стадион — улахан тутууларынан буолаллар. Оонньуулар от ыйын 4 — 9 күннэригэр былааннаналлар, суруйар СИА.
Уус Алдан улууһун баһылыга Алексей Федотов иһитиннэрбитинэн, билигин миэстэтигэр үс улахан спортивнай эбийиэк тутуллар. Николай Тарскай аатынан элбэх хайысхалаах доруобуйаны тупсарынар спортивный комплекс. Кини бэлиэтииринэн, маннык сүдү тутуу өрөспүүбүлүкэҕэ суох. Дьиэ иэнэ 8 тыһ кв м, сүүрэр суоллаах, спорт көрүҥнэринэн араас былаһааккалардаах, фитнес, аэробика саалалардаах, тирдээх.
Мындаабаҕа интернаттаах единоборство саалата тутуллар. Онтон Оонньуулар сүрүн күрэхтэһиилэрэ 1000 миэстэлээх стадиоҥҥа ыытыллыаҕа.
Оройуон салайааччыта эппитинэн, Оонньуулар тутуу эйгэтигэр оруоллара үчүгэй. Ол курдук, сотору кэминэн 75 миэстэлээх оҕо саада, Василий Никифоров-Күлүмнүүр аатынан култуура дыбарыаһа, Бороҕоҥҥо 450 миэстэлээх оскуола тутуллаллар. Оттон бу соторутааҕыта дьыссаат уонна Суоттуга 220 миэстэлээх оскуола дьэндэйэн, үлэҕэ киирдилэр.
