Бэҕэһээ «Үлэ Кыбаарталыгар» Култуура көҕүлээһиннэрин бэрэсидьиэннээҕи Пуондатын бырайыактыыр офиһа арылынна.
Саха сиригэр култуурунай уонна креативнай бырайыактары сайыннарыыга суолталаах хардыы оҥоһулунна. Пуонданы кытта биэс сыл бииргэ үлэлээһин түмүгэр биһиги ааптардарбыт 1,8 тыһыынчаттан тахса сайаапканы ыыппыттар, өрөспүүбүлүкэҕэ 200 мөлүйүөн солкуобай кэриҥэ үп киирбит. Инньэ гынан айар хамаандаларга идиэйэлэрин олоххо киллэрэллэригэр өссө элбэх кыах баар буолуоҕа.
Бырайыактыыр офис бастатан туран ааптардарга үлэлиир тэрил быһыытынан буолуохтаах. Манна социальнай-култуурунай бырайыагы табыгастаахтык оҥорорго үөрэтиэхтэрэ, бырайыактары чочуйарга көмөлөһүөхтэрэ уонна күүстээх сайаапкалары бэлэмниэхтэрэ. Бу кыаҕынан Дьокуускайга эрэ буолбакка, өрөспүүбүлүкэ оройуоннарыгар эмиэ туһаналлара улахан суолталаах. Күүстээх өйүктэр Саха сирин бүтүннүүтүгэр айыллаллар, онон ааптардар наадалаах билиини ылалларыгар уонна гранынан өйөбүлү ылар кыахтаналларыгар наада.
ПФКИ генеральнай дириэктэрэ Роман Владимирович Кармановтыын бу офиһы арыйбыппытыттан үөрэбин. Пуонда баар буолуоҕуттан Саха сирэ биэс сыл устата улахан өйөбүлү ылан кэллэ, уонна ону түмүктэрэ бүгүн өрөспүүбүлүкэ араас муннуктарыгар көстөллөр. Офис үлэтэ бырайыактарбыт хаачыстыбатын үрдэтэригэр, кинилэри олоххо киллэрэргэ элбэх үбү тардарыгар уонна Саха сириттэн ыраахха диэри биллэр-көстөр оҥороругар эрэнэбин. Инникигэ ситиһиилэри, диэн суруйда МАХ-ханаалыгар өрөспүүбүлүкэ баһылыга Айсен Николаев.
