Өлөөҥҥө дьахтар сэбиэтин бэрэссэдээтэлинэн улуус кыргыттарын, дьахталларын, эбээлэрин түмэн 2011 сылтан ветеринарнай сулууспа начальнига Анжелика Николаева үлэлээн кэллэ. Сэбиэт сэттэ чилиэннээх. Биэс сыллааҕы үлэ түмүктэрин отчуоттуур конференцияҕа дьүүллэстилэр.
«Киһи дьон ортотугар олорор, киһи дьоҥҥо, уопсастыбаҕа, дьиэ кэргэнигэр мэһэйдээбэт курдук олоруохтаах. Эйгэтэ үчүгэй буоларын туһугар туруулаһыахтаах. Киһи ол да туһугар дьонтон, норуоттан тэйиэ, дьону абааһы көрүө, бэйэтиттэн тэйитиэ суохтаах. Хас биирдии киһи оннук сиэрдээх буоллаҕына, уопсастыба бүттүүнэ оннук буолуо», — диэн Эдьиий Дора бэргэн этиитэ уопсастыбаннай түмсүүлэргэ ордук сыһыаннаах.
Конференция бэбиэскэтигэр биэс сыллаах отчуоту истии, сыаналааһын, саҥа састаабы талыы, кулун тутарга буолуохтаах СӨ дьахталларын 14 съеһигэр делегаттары талыы боппуруостара турдулар.
Анжелика Николаева кэпсээбитинэн, дьиэ кэргэни, оҕону уонна ыччаты социальнай өттүнэн өйүүр кииннэри кытта холбоһон, Дьокуускайтан психологтар биригээдэлэрин ыҥыран, арыгылыыр дьахталлары эмтэтии үлэтин ыыппыттар.
2015 сылга Сугулаан бэрэссэдээтэлэ Зоя Григорьева көҕүлээһининэн оройуоҥҥа, нэһилиэккэ баар олох ыарахаттарыгар түбэспит, үлэтэ-хамнаһа суох ыалларга депутаттары сыһыаран үлэлэппиттэр. Улуус культураҕа управлениетын үлэһиттэригэр биир соругунан дьон интэриэһин таба тайанан түмсүүлэри тэрийбиттэр. Кирбэй нэһилиэгин активист дьахталлара Аммаҕа, Үөһээ Бүлүүгэ баран дьахталлар түмсүүлэрин кытта көрсөн, уопут атастаһан кэлбиттэр. Былырыын саас Нам улууһун “Автоледи” кулуубун кытта истиҥ көрсүһүү тэриллибит.
Дарья Христофорова төрүт үгэстэри тутуһан иистэнэр норуот маастардарын Е.Д.Александрованы, Е.В.Винокурованы о.д.а. таһаарбыта. Оттон Л.Ф.Илларионова салайар «Оҕуруотчут» кулуубун көмөтүнэн улууска теплицаны олордор, сибэкки арааһын үүннэрэр ыал үксээбит. Тулаайах оҕолор уонна элбэх оҕолоох ыаллар олорор усулуобуйаларын тупсарыыга Майя Кондакова ураты кыһамньытын уурар эбит. Кирбэйтэн Надежда Колодезникова көс олохтоох ыал аатын-суолун, суолтатын үрдэтиигэ бэйэтин кылаатын киллэрэр.
Дьэлиҥдэттэн бэрэстэбиитэл З.П.Игнатьева, «Дылкэн» түмсүү салайааччыта А.И.Шишигина, ЦСПСД киин дириэктэрэ М.А.Трофимова бэйэлэрэ ыытар үлэлэрин ис хоһоонун кэпсээн туран, оройуоннааҕы сэбиэт үлэтигэр сыанабылларын биэрдилэр. Бу курдук бары биир санаанан оройуон дьахталларын сэбиэтин биэс сыллаах үлэтин үчүгэйинэн сыаналаатылар.
Конференция иккис боппуруоһунан сэбиэт саҥа састаабын талыыга мустубут делегаттар бары эйгэттэн хабан туран саҥа сүүрээннэри киллэриэхтэрэ, үлэни-хамнаһы ис сүрэхтэриттэн кыһаллан ыытыахтара диэн бэйэлэрин кандидатураларын эттилэр.
Оройуоннааҕы дьахтар сэбиэтин бэрэссэдээтэлинэн биир санаанан Туяра Петрова талылынна, чилиэннэринэн – Наталья Семенова, Диана Петрова, Люция Илларионова, Туйаара Уодай, Матрена Трофимова, Светлана Николаева, Айталина Степанова, Елена Колтовская, Саргылана Павлова (Өлөөн), Василиса Белолюбская (Харыйалаах).
Дьокуускайга кулун тутар ыйга ыытыллыахтаах СӨ дьахталларын XIV-с съеһигэр делегаттары талыахтарын иннинэ улуус социальнай боппуруостарыгар баһылыгы солбуйааччы Л.В.Александрова быйылгы съезд суолтатын, улуустар делегацияларын уратытын билиһиннэрдэ.
“Биһиги оройуоммутугар үгүс тэрилтэлэргэ үлэлиир салайааччы дьахталлар уопсастыбабытыгар сүрүн оруолу ылаллар. Ол курдук, эр дьоннор үлэлиир эйгэлэригэр коммунальнай хаһаайыстыбаҕа сатабыллаахтык салайар Татьяна Кладкинаны, инники көлүөнэни иитиигэ кылаатын киллэрэр Мария Иванованы, «Мисс Арктика», «Мисс Якутия» курдук кэрэ куолар күрэхтэригэр талааннаах кыргыттарбытын үрдүк чыпчаалга үүннэрэн таһаарбыт Надежда Николаеваны, үҥкүү куруһуогун арыйбыт эдэр ийэ Кристина Гоголеваны, республикаҕа ыытыллар тэрээһиннэргэ кыттар Татьяна Гоголеваны ааттаталыахха сөп. Биһиги ортобутугар билигин суохтар, ахтар-саныыр Өлөөн улууһун талыы-талба дьахталларын, доруобуйа харыстабылын тустарынан кинигэ таһаарбыт Полина Боекова, Клара Спиридонова. Билигин биһиги иннибитигэр уустук соруктар тураллар. Ол эдэр ийэлэр, дьахталлар арыгы дьаатыгар сутуллуулара, ылларыылара. Бөһүөлэкпитигэр ыарахан усулуобуйаҕа олорор, муор-туор олохтоох, сарсыҥҥыларыгар эрэлэ суох ыалларбыт элбэхтэр. Маныаха кэккэ үлэлэр ыытыллаллар эрээри, билиниэххэ наада, дьиҥ иһигэр кыайбакка олоробут. Онон, бу саҥа талыллыбыт састаап маннык ыалларбыт инникилэрэ сырдык, олохторо-дьаһахтара тупсарыгар атын уопсастыбаннай түмсүүлэри кытта биир санааланан тэҥҥэ үлэлииллэригэр баҕарыам этэ”, — диэн санаатын үллэһиннэ.
Бу кэнниттэн делегаттар ааттаабыт кандидатураларыттан съезкэ баралларыгар улууска анаммыт 4 квотаҕа Өлөөнтөн сэбиэт бэрэссэдээтэлэ Т.Н.Петрованы, Харыйалаахтан В.Х.Белолюбскаяны, Дьэлиҥдэттэн М.В.Николаеваны, Ээйиктэн В.П.Семенованы таллылар.
Урукку 90-ус сыллартан дьахтар хамсааһынын үтүө үгэстэрин салҕаан үлэлэппит, уопсастыбаҕа саҥа сүүрээннэри киллэрбит актыыбынай дьахталларынан Харыйалаахтан Николаева Г.В., Кириллова К.В., Өлөөнтөн Камерова К.В., Николаева А.Е., Илларионова Л.Ф. буолаллар. Кинилэр тэрийбит уопсастыбаннай түмсүүлэрэ билигин нэһилиэнньэ иннигэр Хоту дойду ураты култууратын тарҕатарга, харыстыырга, чөл олоҕу өрө тутааһыҥҥа төһүү күүс буолара саарбахтаммат. Онон билиҥҥи састааптан бу ааттаммыт эдьиийдэрин курдук күүстээхтик ылсан, саҥа сүүрээннэри киллэрэн, хотуллубатаҕы кыайан, быһаарыллыбатаҕы быһааран өссө дьаныардаахтык үлэлииллэригэр эрэл улахан.
