Бэс ыйын 3-13 күннэригэр Краснодарга самбо дыбарыаһыгар Николай Павлюков аатынан норуоттар икки ардыларынааҕы кылаастаах спорт маастара аатын үйэтитэр сыаллаах 19-22 саастаахтарга Арассыыйаҕа бастыыр иһин боксаҕа күрэхтэһии буолуоҕа. Саха сириттэн 13 спортсмен кыттыаҕа, диэн «Триумф» СК иһитиннэрэр.
Күрэхтэһиигэ дойду күүстээх эдэр боксердара — регионнааҕы уонна Бүтүн Арассыыйатааҕы турнирдар кыайыылаахтара уонна призердара, РФ субъектарын хамаандаларын бэрэстэбиитэллэрэ, ону тэҥэ национальнай хамаандаҕа киирэр кыахтаах спортсменнар кыттыахтара.
Саха сирин хамаандатын 13 спортсмен: 10 юниор уонна 3 юниорка көрдөрүөхтэрэ. Кыттааччылар ортолоругар хамаанда лидердара, былырыыҥҥы Арассыыйаҕа бастыыр иһин күрэхтэһии үрүҥ көмүс призердара Павел Васильев (48 кг) уонна Руслан Никитин (ол саҕана 60 кг, билигин 63,5 кг) бааллар. Ону тэҥэ Уһук Илиҥҥэ бастыыр иһин күрэхтэһии кыайыылаахтара Иннокентий Слепцов, Ниджат Казымов, Александр Иванов уонна Данил Прокудин бааллар.
Хамаанда сорох чилиэннэрэ Краснодарга тиийэн бэлэмнэнэ сылдьаллар, атыттар Саха сиригэр бэлэмнэнии кэнниттэн, күрэхтэһии буолар сиригэр айаннаатылар.
Саха сирин сүүмэрдэммит хамаандата
Юниордар: 48 кг — Павел Васильев, Дамир Акимов; 51 кг — Иннокентий Слепцов, Максим Припузов; 54 кг — Андрей Егоров; 57 кг — Рамазон Мамаджонов, Ниджат Казымов; 63,5 кг — Александр Иванов, Руслан Никитин; 75 кг — Данил Прокудин.
Юниоркалар 17–18 саастаахтар: 48 кг — Акулина Халгаева.
Юниоркалар 19–22 саастаахтар: 48 кг — Людмила Семенова; 60 кг — Нарыйаана Васильева.
Бэс ыйын 3 — 10 күннэригэр барыллаан киирсиилэр ыытыллаллар. Бэс ыйын 11 — 13 күннэригэр — финал аҥара; бэс ыйын 13 күнэ — финал, наҕараадалааһын.
