18 Тохсунньу 18.01
  • -48°
  • $ 73,82
  • 83,32

Дьокуускайга Саха гимназията 15 сыллаах төрөөбүт күнүн бэлиэтээтэ

09:50, 31 октября 2016
Текст:

Алтынньы 27 күнүгэр Өксөкүлээх Өлөксөй аатынан культура дьиэтигэр Дьокуускай куорат Саха гимназиятын 15 сыллаах үлэтин түмүгүн үөрүүлээх быһыыга-майгыга бэлиэтээтэ. Бу туһунан Дьокуускай куорат Уокуругун дьаһалтатын Үөрэххэ управлениета иһитиннэрэр.


Гимназия дириэктэрэ Валентина Софронеева өрүүтүн өйүүр, кэмигэр өйдүүр дьонугар Саха Өрөспүүбүлүкэтин Ил Дарханыгар Егор Борисовка, Саха Өрөспүүбүлукэтин бырабыыталыстыбатыгар, Саха Өрөспүүбүлукэтин үөрэҕин министиэристибэтигэр, Дьокуускай куорат дьаһалтатыгар, Дьокуускай куорат Уокуругун дьаһалтатын үөрэххэ управлениетыгар махталын биллэрдэ. Маны таһынан Дьокуускай куорат национальнай гимназиятын дириэктэригэр Николай Чиряевка, «Айылгы” төрөппүттэр түмсүүлэригэр, өй-санаа, тирэх буолбут күндү төрөппүттэргэ, саха кэскилэ буолар үөрэнээччилэригэр бүгүҥҥү үөрүүлээх күнүнэн истиҥ тылларын анаата. Валентина Васильевна эҕэрдэтин сахалыы, нууччалыы, немецтии тылларынан эттэ.

Cаха гимназиятия сайдар саҕахтарын, төрүттэммит устуоруйата 2001 сыллаахтан саҕаланар. Саха национальнай гимназиятыгар маҥнайгы кылааска 350-тан тахса оҕо үөрэнэ кэлбит. Бу гимназия үөрэҕин үлэһиттэригэр да, төрөппүттэригэр да соһуччу буолбут. Ордук “Айылгы” уопсастыба түмсүүтүн чилиэннэригэр, эбии сахалыы куттаах-сүрдээх оскуола аһыллыахтааҕа дьэҥкэтик көстүбүтэ. Гимназия онуоха-маныаха диэри Саха национальнай гимназиятыгар тэттик оскуола буолан үлэтин саҕалаабыта.

Гимназия коллективын, үөрэнээччилэрин, төрөппүттэрин эҕэрдэлии кэлбиттэр Үөрэх министрэ Феодосия Габышева, «Россия ийэлэрэ» Бүтүн Россиятааҕы уопсастыбаннай хамсааһын Саха сиринээҕи салаатын бэрэссэдээтэлэ Прасковья Борисова, Дьокуускай куорат Уокуругун дьаһалтатын үөрэххэ управлениетыттан Савелий Адамов, Ыччат уонна спорт министиэристибэлэриттэн Алексей Щербаков, Мария Захарова, Төрүт омуктар оскуолаларын чинчийэр институтун дириэктэрэ Светлана Семенова, атын оскуолалар дириэктэрдэрэ.

img_9066

Феодосия Васильевна Саха гимназиятын салалтатыгар, учууталларга үлэлэригэр үрдүк ситиһиини баҕарда, үөрэхтээһиҥҥэ ахсаабат болҕомтону ууралларын бэлиэтээтэ, улахан махталын төрөппүттэргэ биллэрдэ. Уонна Саха Өрөспүүбүлукэтин үөрэҕин министиэристибэтин аатыттан нуучча уонна саха тыллларын кабинетын аныыр туһунан сертификат туттарда.

Гамбургтан Саха гимназиятын доҕоро, идэтинэн физика уонна нуучча тылын учуутала Матиас Бургхард анаан-минээн кэлбит. Господин Бургхард бэйэтин этиитигэр маннык диэн бэлиэтээтэ: “Саха оҕолоро кыра кылаастан бэйэлэрин төрөөбүт тылларынан үөрэнэллэр, үгэстэрин, омуктарын культуратын билсэллэр, орто кылаастарга английскай, немецкай тыллары үөрэтэн омук сиригэр дьон хайдах олороллорун билсэллэр, холобурга ыллахха Германияҕа. Онтон үрдүкү кылаастарга, мин өйдүүрбүнэн, оҕолор бэйэлэрин салайына үөрэнэллэр. Кинилэр инникилэрэ биһигиттэн аҕа саастаах дьонтон, учууталлартан, төрөппүттэртэн тутулуктаах». Матиас Бургхард физика кабинетыгар анаан салгын станция бэлэхтээтэ.

Саха гимназията үс күн устата куорат учууталларыгар, төрөппүттэргэ Аһаҕас аан тэрийэн 15 сыл устата муспут үлэлэрин түмүгүн көрдөрдүлэр, быыстапка тэрийдилэр.
Изольда Кириллина, немец тылын учуутала, тас дойдулары кытта сибээскэ куратора санаатын үллэһиннэ: “Биһиги гимназиябытыгар ”Диалог культуры” диэн бырайыак үлэлиир. Дьиҥэ эрдэ тэрийбиппит, ол гынан баран дуогабар быһыытынан 2014 сылтан саҕаламмыта. Ааспыт үөрэх дьылыгар “Школьный обмен” диэн бырайыак чэрчитинэн Гамбург куорат араас оскуолаларыттан алта немец учуутала, ыам ыйыгар 14 немец үөрэнээччилэрэ кэлэн ыалдьыттаан көрөн-истэн барбыттара. Онтон бэс ыйыгар биһигиттэн тоҕус оҕо биир ый баран үөрэнэн кэлбиттэрэ. Кинилэр онно тиийэн ыалга босхо олороллор, айаннарын суотун эрэ төлүүллэр. Бу ахсынньы ыйга эмиэ аҕыс учуутал уопут атастаһа бараары сылдьаллар. Биһиги оҕолорбут немецкий языковой экзамен туттараллар, ол эбэтэр DSD экзамен. DSD бырайыагынан Россия үрдүнэн 100 оскуола үлэлиир. Бу экзамен Саха сиригэр 2012 сылтан киирбитэ, биһиги куораппытыгар Саха гимназиятыгар уонна классическай гимназияҕа баар. Иккис кылаастан саҕалаан омук тылын үөрэтэбит. Бэһис кылааска тахсан иккис омук тылын үөрэтэллэр немецкэй-английскай, английскай-немецкэй”.

img_8757

Ааспыт үөрэх дьылыттан гимназияҕа “Новый вектор” поликультурнай киин тэриллибитэ, ол үлэтин туһунан английскай тыл учуутала Татьяна Ядрихинская билиһиннэрдэ.

Саха гимназиятыгар араас төрөппүт түмсүүлэрэ олус көхтөөхтүк үлэлииллэр. Олортон биирдэстэрэ “Аҕа сүбэтэ” буолар. Бу туһунан Сэбиэт бэрэссэдээтэлэ Александр Семенов кэпсээтэ: “Маннык тэрилтэ оскуола аайы баар буолбатах, салайааччыбыт гимназия учуутала Егор Егорович Жерготов көҕүлээн үлэлэтэр. Үс сылга талыллыбыта. Балаҕан, алтынньы ыйдарга түмсэн мунньахтыыбыт, сыллааҕы былаан ылынабыт. Холобур хас биирдии кылаастан биирдии аҕа кэлэн кыттар уонна атыттарга тиэрдэр туох үлэ барыахтааҕын. Сүрүннээн оҕону сахалыы эйгэҕэ сыһыарааһын диэн сыал-сорук туруоран үлэлиибит. Куорат оҕолоро, оннооҕор муус аннынан хайдах балыктыыры билбэттэр, булт-алт туһунан эмиэ өйдөбүллэрэ аҕыйах, дьэ ол онно үгэс сүтэн хаалбатын курдук күүс-көмө буолар үлэни ыытабыт. Өссө гимназия бэйэтэ муҥхалаах, онон сайын да, кыһын да уолаттар аҕаларын кытта балыктыыллар. “Аҕа уонна Уол” диэн күрэх өрөспүүбүлүкэҕэ олус тэнийдэ, куорат да иһинэн ыытыллар буолла, онно гимназия куруук кыттар”. Александр Александрович саха гимназията сөп хайысханан оскуола сайдан иһэрин, кэлин сылларга материальнай-техническай базата тупсубутун, саҥа куорпус үлэҕэ киирбитин астынан бэлиэтээтэ. Онон төрөппүттэр бары күүстэрин ууран гимназия өрөспүүбүлүкэ биир бастыҥ оскуолата буоларыгар кыһаллалларын эттэ.

15 сыллаах үбүлүөйү бэлиэтиир дьоро киэһэҕэ ырыа-тойук дьиэрэйдэ, үҥкүү-битии көҕүлүттэн туттулар, үлэлэригэр үрдүк ситиһиилээх гимназия үлэһиттэригэр наҕараадалар туттарылыннылар.

0
0
18 января 18.01
  • -48°
  • $ 73,82
  • 83,32