Арассыыйа социальнай үлэһиттэрин күнүгэр дойду бырабыыталыстыбатын бэрэссэдээтэлин солбуйааччы Татьяна Голикова түөрт эрэгийиэҥҥэ алта саҥа социальнай эбийиэги арыйбытын туһунан Ил Дархан Айсен Николаев MAX мессенджергэ иһитиннэрдэ. Кинилэр ортолоругар — Мэҥэ Хаҥалас улууһун Матта сэлиэнньэтигэр баар Маттатааҕы социальнай-геронтологическай киин.
Саҥа тутуу Арассыыйа президенэ Владимир Путин быһаарыытынан «Биир ньыгыл Арассыыйа» өйөбүлүнэн «Дьиэ кэргэн» национальнай бырайыак чэрчитинэн тутулунна. Уопсай иэнэ — 5 тыһыынчаттан тахса квадратнай миэтэрэ. Аҕам саастаахтарга уонна доруобуйаларынан хааччахтаах дьоҥҥо анаан киэҥ-куоҥ хостор, сынньанар уонна алтыһар сирдэр, адаптивнай физкултуура саалата, куруһуоктарга уонна маастар-кылаастарга аналлаах хостор оҥоһуллубуттар.
Билигин кииҥҥэ 40 киһи олорор, бэс ыйын бүтүүтэ симиэнэни толорор былааннаахтар. Саамай аҕам саастаах олохтооҕо — 99 саастаах.
Киин Матта күөлүн үрдүгэр, ойуур аттыгар турар. Улуус олохтоохторо күнүс үөрэнэ, куруһуоктарга сылдьа уонна алтыһа кэлэр кыахтаахтар. Сотору «Передышка» диэн оҥкулу үлэлэтэр былааннаахтар: аҕам саастаах киһини, чугас дьоно сынньанар кэмнэригэр, быстах кэмҥэ кииҥҥэ олохтуур кыахтаныахтара.
«Киин аҕам саастаах көлүөнэҕэ сылааһынан, кыһамньынан уонна ытыктабылынан толору дьиэ буоллун», — диэн суруйда Айсен Николаев.
