Россия күнүгэр, бэс ыйын 12 чыыһылатыгар, «Биир ньыгыл Россия» партия Саха сиринээҕи салаата өрөспүүбүлүкэтээҕи тэрээһиҥҥэ — дойду өрөгөйүн ырыатын толорууга — кыттыаҕа.
«Биир ньыгыл Россия» партия куорат олохтоохторун уонна ыалдьыттарын дойду өрөгөйүн ырыатын бииргэ толорууга ыҥырар. Маннык ураты тэрээһин «Доҕордоһуу» болуоссатыгар буолар.
Сарсыарда эрдэттэн сахалыы, нууччалыы тылынан суруллубут ырыа текстээх ыҥырыы суруктары куорат олохтоохторугар түҥэтиэхтэрэ. Акция 11:00 чааска саҕаланар.
«Биһиги көхтөөх дьон этиилэрин өйүүр эрэ буолбатахпыт, өссө сайыннаран биэрэбит. Бары муниципальнай тэриллиилэр баһылыктарыгар биһигини кытта тэҥҥэ ыллыылларыгар этии оҥордубут. Онон улуустарга баар кылаабынай болуоссаттарга норуот түмсэн, Россия өрөгөйүн ырыатын ыллыахтара. Бу саамай сөптөөх буолуо дии саныыбыт, хас биирдии Россия гражданина бэйэтин өрөгөйүн ырыатын билэрэ кини ытык иэһэ», — диэн бэлиэтээтэ партия толорор кэмитиэтин салайааччыта Дмитрий Никифоров.
