Дойду оборонаҕа миниистирэ Сергей Шойгу быһаарыытынан бүгүн Саха сирин ойуурун баһаардарыгар Уһук Илин байыаннай уокуругуттан инженернай рота 106 байыаһа көмөҕө кэлиэхтэрэ. Тимир суолунан 16 араас тиэхиникэ кэлиэ.
Суһал ыстаап күннээҕи иһитиннэриитигэр бастакы вице-премьер Дмитрий Садовников билигин өрөспүүбүлүкэ үрдүнэн 173 ойуур баһаара баарын, итинтэн 58 умулуннаралларын эттэ. Баһаарга барыта 2495 киһи, 319 тиэхиникэ үлэлиир.
Бүгүн Ан-26 сөмөлүөт Өлүөхүмэҕэ, Ленскэйгэ, Дьокуускайга, кыаллар буоллаҕына Ньурбаҕа үлэлиэ.
Билигин да Сииттэ, Кэбээйи нэһилиэктэригэр, Үөһээ Бүлүү Кырыкыйыгар, Далырыгар, Хомустааҕар, Дүллүкүтүгэр, Уус Алдан Кылаайытыгар, Томпо Ударнигар, Хандыгатыгар уот суоһуур куттала баар.
