СӨ Ил Түмэн Бэрэссэдээтэлэ Александр Жирков олунньу 3 күнүгэр Россия Федерациятын Федеральнай Мунньаҕын Судаарыстыбаннай Думатын бэрэссэдээтэлин солбуйааччы, “Биир ньыгыл Россия” партия парламеҥҥа фракциятын салайааччыта Владимир Васильевы кытта көрүстэ.
Александр Жирков Саха Өрөспүүбүлүкэтин парламенын 2016 сыллааҕы үлэтин түмүгүн билиһиннэрдэ. Чуолаан Ил Түмэн Судаарыстыбаннай Думаҕа федеральнай сокуоннар барылларын оҥорууга үлэтигэр сиһилии тохтоото. Ааспыт сылга Саха сирин парламена көҕүлээбит үс сокуон барыла Госдумаҕа ылыллан, федеральнай сокуон буолла. Билигин РФ Судаарыстыбаннай Дууматыгар парламенын аллараа палаататын көрүүтүгэр Ил Түмэн аҕыс сокуонун барыла киирэн турар. Олортон биирдэстэрэ — «Россия Федерациятыгар гражданнар доруобуйаларын харыстааһын төрүттэрэ» федеральнай сокуонҥа көннөрүү киллэрии (медицина тэрилтэлэрин уларытан тэрийиигэ уонна сабыыга быһаарыыны ылар чааһыгар) туһунан» федеральнай сокуон барыла бастакы ааҕыыга ылыллыбыта.
Ил Түмэн спикерэ Александр Жирков Судаарыстыбаннай Дума бэрэссэдээтэлин солбуйааччы Владимир Васильев болҕомтотун ордук «Сир аннынааҕы баай туһунан» федеральнай сокуон 37 ыстатыйатыгар көннөрүүлэри киллэрии туһунан» уонна «Судаарыстыбаннай уонна муниципальнай хонтуруолу олохтооһуҥҥа юридическай сирэйдэр уонна чааһынай предпринимателлэр бырааптарын көмүскээһин туһунан» федеральнай сокуон 1 ыстатыйатыгар көннөрүү киллэрии туһунан» федеральнай сокуоннар барылларыгар туһаайда. Маныаха сир аннынааҕы баайы чинчийиини, көдьүүстээхтик туһаныыны уонна харыстааһыны судаарыстыба өттүттэн кэтэбили «Судаарыстыбаннай уонна муниципальнай хонтуруолу олохтооһуҥҥа юридическай сирэйдэр уонна чааһынай предпринимателлэр бырааптарын көмүскээһин туһунан» федеральнай сокуон дьайыытыттан таһаарыы сорох сир баайын туһанааччылар тиһигэ быстыбат бэрэбиэркэттэн куотуналларын тохтотуо. Маны таһынан Ил Түмэн «Сир аннынааҕы баай туһунан» федеральнай сокуон 37 ыстатыйатыгар сир аннынааҕы баайы чинчийиини, көдьүүстээхтик туһаныыны уонна харыстааһыны судаарыстыба өттүттэн кэтэбили федеральнай ситэриилээх былаас уонна регионнааҕы ситэриилээх былаас анал боломуочуйалаах уорганнара былаан быһыытынан уонна былааны таһынан олохтуулларын туһунан көннөрүү киллэрэргэ этиилээх. Сокуон барылларын ылыныы сир аннынааҕы баайы туһаныыны бэрээдэктээһиҥҥэ төһүү күүс буолуо.
Александр Жирков уонна Владимир Васильев «Хоту сир, Сибиир, Уһук Илин төрүт олохтоох аҕыйах ахсааннаах омуктара общинанан уонна биирдиилээн сир учаастагын туһаныыга быраабы ылыыларын боппуруоһугар Россия Федерациятын сорох сокуонун акталарыгар көннөрүү киллэрии туһунан» сокуон барылын тула кэпсэттилэр. Сокуон барыла Хотугу сир, Сибиир, Уһук Илин аҕыйах ахсааннаах төрүт омуктара бэйэлэрэ түөлбэлээн олорор сирдэригэр учаастагы туһаныыга сири босхо ылар кыахтаналларыгар туһуланар. Бырайыакка Судаарыстыбаннай Дума сис кэмитиэтэ уонна икки сыһыаннаах кэмитиэт сөбүлэҥнэрин биэрбиттэрэ. Судаарыстыбаннай Дума быраапка управлениета сокуон барылын туһунан итэҕэс ыйыллыбатах түмүгү оҥорбута. Ону таһынан Уһук Илин уонна Байкал регионун парламеннарын ассоциациятын уопсай мунньаҕар парламеннар сокуон барылын дьүүллэһэн, бары өйөөбүттэрэ. Ол эрээри Россия Федерациятын Бырабыытылыстыбата күн бүгүҥҥэ диэри сокуон барылын ылынары утара олорор.
Санаттахха, ааспыт сылга «Уһук Илиҥҥи гектар туһунан» федеральнай сокуоҥҥа Саха сирин көннөрүүлэрин сорох өттүн Судаарыстыбаннай Думаҕа «Биир ньыгыл Россия» партия фракцията өйөөбүтэ. Ону тэҥэ, 2016 сыл ахсынньытыгар «Россия Федерациятын Уһук Илин федеральнай уокуругун субъектарын сиригэр-уотугар судаарыстыба эбэтэр муниципальнай бас билиигэ баар учаастагы гражданнарга туһаныыга биэрии уратыларын уонна Россия Федерациятын сорох сокуон акталарыгар көннөрүү киллэрии туһунан» Федерация Сэбиэтин сенатордара, Судаарыстыбаннай Дума депутата Ирина Яровая, Ил Түмэн киллэрбит сокуонҥа көҕүлээһиннэрэ эмиэ өйөбүлү ылбыта.
