Ил Дархан Айсен Николаев сэтинньи 30 күнүгэр таһаарбыт ыйааҕынан үһүттэн сэттэтигэр диэри саастаах оҕолорго ыйдааҕы төлөбүрү анааһыҥҥа уларыйыылар киирдилэр.
Ол курдук, РФ бырабыыталыстыбатын уурааҕыгар олоҕуран холуобунай-толорор систиэмэ, куттал суох буолуу сулууспатын федеральнай уорганнарын, судаарыстыбаннай харабыл, ис дьыала уорганнарын үлэһиттэрэ дохуоттарын туһунан докумуоннарын бэйэлэрэ социальнай харалта управлениеларыгар тиксэрэллэр.
Биир киһиэхэ тиксэринэн дохуот орто кээмэйин ааҕыыга дьиэ кэргэн састааба уларыйда. 2021 сыл тохсунньу 1 күнүттэн саахсата суох эрээри бииргэ олорор ыал иккис төрөппүтүн дохуота кытта ааҕыллыа.
Маны таһынан эмтэнэ, реабилитациялана барыыга биир кэмнээх айан төлөбүрэ, үһүс, эбэтэр онтон кэлэр оҕо төрөөтөҕүнэ ананар ыйдааҕы төлөбүр, оҕоҕо урут өттүгэр төлөнө сылдьыбыт ыйдааҕы төлөбүрдэр, ийэ хапытаала, өрөспүүүлүкэтээҕи «Дьиэ кэргэн» ийэ хапытаала ыал дохуотугар киирсибэт буоллулар.
Бу уларыйыылар төрөппүттэр уонна үлэ министиэристибэтин кыттыгас үлэлэрин түмүгэ буолар. Саҥа балаһыанньа бу дьыл тохсунньу 1 күнүттэн ананар босуобуйаҕа сыһыаннаахтар.
