19 Тохсунньу 19.01
  • -48°
  • $ 73,82
  • 83,32

Ыһыах нэһилиэк төрүттэммитэ 95 сылыгар ананна

16:14, 23 июня 2016

Үрүҥ тунах ыһыахтар сир-сир аайы сириэдийэн, сиэрдэрэ ситэн, тупсан, дьону-сэргэни түмэн, ураты күүһү-уоҕу иҥэрэргэ дылылар. Таатта улууһун Амма нэһилиэгэр ыһыахтара нэһилиэк бэлиэ даататыгар ананан өрө көтөҕүллүүлээхтик буолла. Бу туһунан «Айылгы» СК дириэктэрэ Марианна Решетникова кэпсээтэ.


«Нэһилиэкпит үбүлүөйдээх ыһыаҕар куонкурус, күрэстэһии арааһа тэрилиннэ, көмөлөһөөччү, өйөөччү элбэҕэ үөртэ. Ол курдук, сытыы бөрүөлээх суруналыыс, байанайдаах булчут, уот сэрии кыттыылааҕа Михаил Соров төрөөбүтэ 100 сылыгар аналлаах норуот ырыатыгар куонкуруска оҕотуттан аҕам саастаах дьонугар тиийэ көхтөөх кыттыыны ыллылар. Сүрүн бирииһи Михаил Соров аймахтара туруордулар. Бу күн мааны далбардар, хорсун хоодуоттар, сир симэхтэрэ оҕолор сахалыы таҥастара болҕомтону улаханнык тарта. Маны сэргэ, ыраахтан кэлбит ыалдьыппыт Людмила Кулаковская киэргэлэ дьону-сэргэни сөхтөрдө. Чаппараах дьэрэкээнэ көрөөччүлэри кэрэхсэттэ. Бу куонкурус  норуот маастара Агафья Кулаковская сырдык кэриэһигэр ананна. Манна ааттаах-суоллаах иистэнньэҥнэри сэргэ, тигэргэ саҥа холонооччулар кыттыспыттара сонун буолла. Күрэхтэһиини уран тарбахтаах Агафья Петровна оҕолоро, сиэннэрэ бириистэрин туруоран, көҕүлээн, тэрийэн ыыттылар. Ыһыах күн оһуохай ыраахтан дуораһыйан дьикти-кэрэ тойук буолан куйаарга кутуллан олордо. Сэргэх күрэстэһиини Алексей Николаев иилээтэ-саҕалаата. Маныаха оһуохайы кэнчээригэ иҥэрии үтүө үгэһин салҕаан, өрөспүүбүлүкэтээҕи «Оһуохай» түмсүүнү салайар Александр Данилов өйөөбүтэ, көмөлөспүтэ дьону-сэргэни көҕүлээн биэрдэ. «Нэһилиэк историятын кэрэһиттэрэ» хаартысканан куонкурус, уран тарбахтаах маастардар оҥоһуктара, быыстапка бэртээхэйэ тэрилиннэ», — диэтэ Марианна Константиновна.IMG-20160623-WA0027

Ыһыах күн дохсун ытыс тыаһыгар доҕуһуоллатан өр сылларга управляющайдаабыт, сэбиэккэ бэрэссэдээтэллээбит Егор Ивановка «СӨ тыа хаһаайыстыбатын үтүөлээх үлэһитэ» бэлиэ, ону сэргэ бастыҥ үлэһиттэргэ наҕараадалар туттарыллыбыттар.

Быыппастар быччыҥнаахтар, быһый атахтаахтар күрэстэһиилэригэр «Тоҕус моһолго» Александр Малышев бастаан « STIHL» эрбиинэн (бирииһи Изабелла Чарина туруорбут), Иван Алексеев иккис миэстэҕэ тахсан 10 т. чоҕунан, үһүс бириистээх миэстэлэммит Айастаан Попов 250 ботуруонунан (Андрей Варламов спонсордаабыт), төрдүс миэстэҕэ тиксибит Иннокентий Ючюгяев олохтоох дьаһалта биэс тыһыынчалаах сертификатынан наҕараадаланан бар дьоннорун эҕэрдэлэрин туппуттар. Хойукка диэри түөлбэлэринэн эстафетаҕа, хапсаҕайга, мас тардыһыытыгар күрэхтэһиилэр уоттаахтык-күөстээхтик салҕаммыттар. Ыһыахчыттар Данил Афанасьев алгыһын ылан сэргэхсийбиттэр. Марианна Константиновна ыһыаҕы көрсө үгүс үлэ-хамнас ыытыллыбытын эттэ, долгутуулаах улахан тэрээһини олохтоохтор уонна бу нэһилиэктэн куорсун анньынан үүнэн-сайдан тахсыбыт дойдулаахтара үөрүүнэн өйөөбүттэригэр, көмөлөспүттэригэр олохтоохтор ааттарыттан махтанна. Бэлиэ даатаҕа анаммыт тэрээһин салҕанарын, өссө да былаан элбэҕин бэлиэтээтэ.

0
0
19 января 19.01
  • -48°
  • $ 73,82
  • 83,32