Сунтаар улууһун көхтөөх, бастыҥтан бастыҥ ыччаттара бэс ыйын 12 күнүгэр Тойбохой сынньалаҥ пааркатыгар бастакы улуустааҕы Ыччат ыһыаҕар кытыннылар. Манна Аллыҥаттан, Илимнииртэн, Кириэстээхтэн, Күүкэйтэн, Наахараттан, Тойбохойтон, Сунтаартан, Элгээйиттэн, Устьеттан уонна Сиэйэттэн эдэр ыччаттар күөн көрүстүлэр.
Ыһыах үөрүүлээх аһыллыытыгар улуус баһылыга А.В. Григорьев, баһылыгы социальнай, имиджевай бэлиитикэҕэ солбуйааччы У.Д. Попова, баһылыгы экэнэмиичэскэй сайдыыга уонна стратегическэй былааннааһыҥҥа солбуйааччы М.М. Прокопьев, нэһилиэктэр баһылыктара ыалдьыттаатылар. Кыттааччылар оһуохай этиитигэр, дэгэрэҥ ырыаны толорууга, хомуска, тойукка күрэхтэстилэр. Быһый атахтаах эр бэртэрэ кылыыга, хапсаҕайга, мас тардыһыыга илин-кэлин түһүстүлэр.
Хамаанданан күрэххэ I миэстэни уонна 15 тыһ. солк. суумалаах сертификаты Тойбохой, II миэстэни уонна 10 тыһ. суумалаах сертификаты Элгээйи, III миэстэни уонна 5 тыһ. суумалаах сертификаты Сиэйэ хамаандалара ыллылар. Биирдиилээн кыайыылаахтарга эмиэ харчынан сертификат туттарылынна.
Улууска бастакытын ыытыллыбыт Ыччат ыһыаҕа, тэрийээччилэр этэллэринэн, табылынна!
