Сунтаардааҕы 2 №-дээх оскуола 10 сыл анараа өттүгэр оскуоланы бүтэрбит, ХИФУ преподавателэ Изабелла Борисова өйөбүлүнэн ЮНЕСКО холбоһуктаах оскуолалар ситимигэр киирбитэ.
Оройуон дьокутааттарын Сэбиэтин бэрэссэдээтэлэ М.А. Максимов, ХИФУ омук тылын филологиятын уонна регионоведение институтун доцена, педагогическай наука кандидата, 2 №-дээх оскуола туйгун выпускнига И.З. Борисова, ХИФУ французскай тыл преподавателэ Филипп Касетарий оскуолаҕа кэлэ сырыттылар.
ЮНЕСКО үлэлиир хайысхаларынан үөрэнээччилэргэ аһаҕас уруоктар, маастар-кылаастар, конференциялар ыытылыннылар. Оҕолор аныгы технологияны сөпкө туттан үлэлииллэрин «Модель робота «Фотограф», «Электрические явления», «Юный овощевод», «Сахалыы истииллээх чаһыны оҥоруу» диэн аһаҕас уруоктарга көрдөрдүлэр. Салгыы «Человек и общество в меняющемся мире» научнай-практическай конференция буолла. Салайааччыларга, учууталларга ыытыллыбыт «төгүрүк остуолга» элбэх санаа этилиннэ, саҥа сыал-сорук турда.
Көрсүһүү түмүгүнэн Изабелла Захаровна: «10 сыл анараа өттүгэр ЮНЕСКО ситимигэр хас да оскуоланы киллэрэр үлэ ыытыллыбыта. Сунтаартан Күндэйэ оскуолата уонна 2 №-дээх оскуола баар этилэр. Оччолорго бу оскуола Саха-канадскай оскуола бырагырааматынан үлэлээн, тылы дириҥник үөрэтэн саҕалаабыта. Кэлин хайысхалара уларыйда, агро-оскуола буолла. Бэйэм бу оскуоланы бүтэрбитим, оскуолам сайдарын туһугар үлэлэһэбин, араас преподавателлэри аҕалабын, французскай тылы үөрэтэр оҕолору стажировкаҕа ыытарга көмөлөһөбүн. Биһиги университеппыт Франция 10 университетын кытта үлэлэһэр. Олор истэригэр ХИФУ ХИНТуоКИ «Туризм уонна социальнай култуурунай сервис» кафедратыгар магистратура аһыллан, Франция туризм университетын кытта үлэлэһиэхтээхтэр. Филипп – туризм университетын профессора, ХИФУ-га бу кафедра преподавателинэн үлэлиир», — диэн санаатын эттэ.
