Бу дьыл кулун тутар 30-31 күннэригэр Хабаровскай куоракка «Генеалогия Дальнего Востока. История, реальность, перспективы развития» диэн конференция буолла. Тэрээһиҥҥэ Уһук Илин регионнара бары уонна Казахстаантан, Санкт Петербург куораттан кыттыыны ыллылар, барыта 24 дакылаат буолла.
Саха сириттэн делегацияны Саха сиринээҕи Төрүччү общественнай институтун директора Аргунов Константин Ильич салайан илдьэ сырытта. Кини Саха Өрөспүүбүлүкэтигэр Төрүччүнү оҥоруу үлэтин уонна билиҥҥи туругун туһунан дакылаат оҥордо.
Конференцияҕа Саха сирин аатыттан бэйэлэрин үлэлэрин билиһиннэрэн дакылааттарынан кытыннылар: профессор Саввинов Андрей Саввич, ХИФУ философия кафедратын сэбиэдиссэйэ (Саха Республикатын төрүт олохтоохторун төрүччүлэрин оҥоруу концепцията), Семенова Ольга Ивановна, «Кэскил» оҕо издательствотын генеральнай дириэктэрэ (Оҕоҕо аналлаах хаһыаттар, сурунааллар нөҥүө Төрүччү оҥоһуутун тосхоллоро), Вырдылин Гаврил Гаврильевич, краевед, Таатта улууһун Чөркөөх Ытык сүбэтиттэн (Нэһилиэк сирдэрин төрүт ааттарын, өбүгэлэр олорбут алаастарын чуолкайдаан электроннай картаҕа киллэрии уонна мобильнай сибээс сыһыарыытынан ыччакка тарҕатыы), Христофоров Афанасий Христофорович, Нам улууһун Хатыҥ Арыы музейын директора (Саха Республикатын Национальнай библиотеката Төрүччү оҥоһуутугар оруола), Шишигина Иванна Ивановна, Амма улууһун Сатаҕай орто оскуолатын директора (Оскуола оҕолоругар Төрүччүнү үөрэтии), Комиссаров Юрий Юрьевич, Томпо улууһун Мэҥэ Алдан баһылыга (Нэһилиэк ыалларын Төрүччүтүн чуолкайдаан электроннай архивка киллэрии), уонна элбэх ыйытыыларга хоруйдаатылар.
Конференция уонна Төгүрүк остуол кыттыылаахтара Саха сиригэр Төрүччүнү үөрэтиигэ элбэх хайысханан күүстээх үлэни ыытыы, ыччаты төрөөбүт дойдутугар тапталы иитиигэ олус көмөлөөҕүн, Төрүччүнү үөрэтии Государственнай таһымҥа тахсыбытын уонна маннык хабааннаах үлэ атын регионнарга суоҕун бэлиэтээтилэр. Уһук Илин регионнара бары кыттыһан, Саха сирин ситиһиитин холобур оҥостон, көмөлөөн Россия бары регионнарыгар тарҕатан, үлэни тэрийэргэ сүбэлэстилэр уонна аныгыскы Форуму Дьокуускай куоракка ыытарга былааҥҥа киллэрдилэр.
ҮҺүс күҥҥэ Конференция кыттыылаахтара Хабаровскай куорат кэрэ-бэлиэ миэстэлэринэн, Кыраайы үөрэтэр музейга сырыттылар. Төрдүс күҥҥэ Саха сирин Государственнай мунньаҕын Ил Түмэн председателин солбуйааччы Владимиров Афанасий Семенович салалтатынан Правительства Уһук Илиҥҥи салаатыгар Степанова Диана Афанасьевнаны көрүстүлэр, инники үлэни торумнастылар, Хабаровскай куорат Үрдүк үөрэх кыһаларын салалталарын кытта көрсүһүүлэргэ кытыннылар.
Ааптар: Гаврил Вырдылин
