Саха сиригэр ойуур баһаардарын утары охсуһууга «Полярные авиалинии» авиахампаанньа Ан-26 «Атмосфера» зондировщик-сөмөлүөтэ үлэтин саҕалаата.
Авиахампаанньа пресс-сулууспата иһитиннэрбитинэн, «Атмосфера» Уус Маайа уонна Амма улуустарыгар сөҥүүнү күүһүрдэр рейс оҥордо. Томпо уонна Таатта улуустарыгар баар ойуур баһаардара тарҕамматын туһугар, баһаартан сэрэхтээх буолуу кылааһын намтатар сыалтан эмиэ оҥордулар.
Көтүү Саха сирин Быыһыыр сулууспатын сайаапкатынан тэриллэр. Бортка Киин аэрологическай обсерватория исписэлиистэрэ үлэлииллэр, кинилэр радиолокационнай кэтээн көрүүнү ыыталлар уонна былыкка дьайыытын сүрүннүүллэр. Көтөр кэмнэригэр исписэлиистэр Амма уонна Уус Маайа оройуоннарын үрдүнэн сөптөөх ресурсалаах былыттары булбуттар.
Быһаарыы
Ан-26 «Атмосфера» — Арассыыйаҕа бастакы гражданскай сөмөлүөт, «Полярные авиалинии» күүһүнэн саҥардыллыбыт. Кини Арассыыйа оҥоһуу тэрилинэн сөҥүүнү ыҥырарга аналлаах.
