Оҕунан ытыыга Арассыыйа чемпионатын иитинэн косплейгэ күрэх буолуо, бириис пуондата — 30 тыһыынча солкуобай.
Сүрүн ирдэбил — уобарас турнир тиэмэтигэр сөп түбэһиэхтээх: талыллыбыт персонаж оҕунан ытыыны кытта сибээстээх буолуохтаах. Кыттааччылар киинэ, видео-оонньуу уонна аниме биллэр дьоруойдарын уобарастарын арыйыахтарын, эбэтэр дьүүллүүр сүбэҕэ бэйэлэрин айбыт персонажтарын билиһиннэриэхтэрин сөп.
Күрэх булкаас киэбинэн ыытыллыа:
Офлайн: чемпионатка бэлэмнэммит көстүүмнээх тиийии. Косплеердары хаартыскаҕа түһүү уонна дьүүллүүр сүбэҕэ, көрөөччүлэргэ уобараһын көрдөрүү күүтэр.
Онлайн: кыттааччылар косплейдарын хаартыскатын, персонаж аатын, төрүт матырыйаал аатын (киинэ, оонньуу) уонна никнейм ыйан туран, тэйиччиттэн ыытыахтаахтар. Бу үлэлэр чемпионат официальнай саайтыгар уонна социальнай ситимнэригэр тахсыахтара.
Экспертэр көстүүм хаачыстыбатын уонна сиһилии оҥоһуллуутун, уобарас тас көстүүтүн уонна уратытын, ону тэҥэ персонажка майгыннаһарын сыаналыахтара.
Сиһилии иһитиннэриини Саха сирин Оҕунан ытыы федерациятын страницатыгар көрүөххүтүн сөп, диэн суруйда ЯСИА.
