Россия 2036 сылга сайыҥҥы Олимпиаданы ыытыыга сыаллаахтык үлэлиир. Ол туһунан вице-премьер Дмитрий Чернышенко иһитиннэрдэ. Кини спорт министиэристибэтигэр уонна Россия Олимпийскай кэмитиэтигэр киэҥ далааһыннаах күрэхтэһии буолар куоратын талыыга сорудах бэриллибитин эттэ.
«Сайаапка биэрэр куораты талыы — Олимпийскай кэмитиэт, спорт министиэристибэтэ, Оонньуулары ылар дойду субъегын боломуочуйалара. Юридическай мэктиэлэр бэриллэллэр, бу дьоһуннаах боппуруос буолар. Мин билэрбинэн, норуоттар икки ардыларынааҕы олимпийскай кэмитиэт куонкурсу биллэрэ илик, онон күүтэбит», — диэтэ Чернышенко Россияҕа 2021 сыл түмүгүнэн спорт сайдыытын оптуорунньуктааҕы мунньаҕар.
«2036 сыллааҕы Оонньууларга сайаапканы биэрэр хайаан да наадалаах, дойду үрдүнэн саамай сөптөөх кандидаты талыахтаахпыт. Минспорду уонна кэмитиэти Оонньуулары ыытыыга сөптөөх куораты булуу дьаһалын тэрийэргитигэр, салгыы МОК сайаапканы хомуйар хампаанньата саҕаланарын күүтэбит», — диэтэ вице-премьер.
Кини эппитинэн, Уһук Илиҥҥэ үчүгэй усулуобуйа баар, маны сэргэ Сочига, манна 2014 сыллаахха кыһыҥҥы Олимпиада буолбута. «Сочи сайыҥҥы да Оонньуулары ылар кыахтаах», — диэтэ Чернышенко.
Эрдэ биллэрбиттэринэн, сайыҥҥы «Олимпиада-2036» Казань унна Владивосток куораттарга ыытарга этии баара.
Источник: «Интерфакс»
Хаартыска: Eurosport
