14 От ыйа 14.07
  • 31°
  • $ 87,74
  • 95,76

Ил Дархан нэдиэлэтэ: 2022 сылга федеральнайдааҕы субсидия 32 млрд 500 мөл солк тэҥнэстэ

Читайте нас на
Яндекс Новости
ЯДВ

Сэтинньи 29 күнүгэр Айсен Николаев өрөспүүбүлүкэ Бырабыыталыстыбатын салалтатын уонна Ил Дархан дьаһалтатын кытта сүбэ мунньахха  ааспыт сайын ойуур баһаарын умуруорууга үлэлээбиттэртэн түөрт гыммыттан биирдэрэ баччааҥҥа диэри хамнастарын ыла иликтэрин туһунан эттэ. Бырабыыталыстыбаны федеральнай киини, чуолаан дойду Үпкэ министиэристибэтин кытта ыкса үлэлэһэн, иэһи  уталыпакка төлүүргэ соруйда.

Арассыыйа Бырабыыталыстыбатын саппаас пуондатыттан эрэгийиэннэргэ 5 млрд солк. тахса үп коронавирустаабыт ыарыһахтар быраас кэтэбилинэн дьиэҕэ олорон эмтэнэллэригэр анаммытын туһунан Ил Дархан иһитиннэрдэ. Ону таһынан кэлэр сылга уустук килиимэттээх уонна олорорго кытаанах усулуобуйалаах 5 эрэгийиэҥҥэ медицинскэй страховка пуондатыттан эбии 6,3 млрд солк. көрүллүө, онтон Саха сиригэр  4,1 млрд. солк. тиксиэ диэн эттэ. Дойду Бырабыыталыстыбатын сэтинньи 24 күнүнээҕи уурааҕар медицинскэй страховка полистаах киһиттэн ханнык түгэннэргэ ПЦР-тест босхо ылылларын туһунан ыйыллар. Тымныйан ыалдьыбыт киһиэхэ хамсык симптома баар буоллаҕына, эбэтэр ыарыһах үтүөрбүтүн итиэннэ экспресс-тест ыарыы баар диэн көрдөрүүтүнэн диагноһы бигэргэтэргэ.

Сэтинньи 29 күнүгэр Ил Дархан суһал ыстаап мунньаҕар ааспыт нэдиэлэҕэ Нерюнгрига, Хаҥаласка, Томпоҕо хамсыгынан ыарыы элбэҕин бэлиэтээтэ. Амма, Үөһээ Бүлүү, Горнай, Кэбээйи, Мииринэй, Нам, Нерюнгри, Өлүөхүмэ, Уус Алдан уонна Чурапчы улуустарыгар ыарыы намырыы илик, онтон быһыыны ылыы билигин да 60%-ҥа тиийбэт. Айсен Николаев онон бу күннэргэ быһыыны биэрии күүһүрүөхтээҕин туһунан эттэ.

Сэтинньи 29 күнүгэр Ил Түмэн ХХХI-с пленарнай мунньаҕын иннинэ Айсен Николаев «Биир ньыгыл Россия», РФКП, «Сиэрдээх Россия» уонна РЛДП баартыйалартан дьокутааттары кытта 2022 сылга уонна былааннанар 2023-2024 сс. өрөспүүбүлүкэ бүддьүөтүн тула кэпсэттилэр. Ил Дархан 2021 сыл уон ыйын түмүгүнэн бырамыысалыннас көрдөрүүтэ былырыыҥҥытааҕар 22 %-нан улаатан, Уһук Илиҥҥэ бастыҥмыт, дойду үрдүнэн инники күөҥҥэ таҕыстыбыт диэн бэлиэтээтэ. Бырабыыталыстыба уонна Ил Түмэн холбоһуктаах үлэлэрин түмүгэр бүддьүөт бырайыагар үбүлээһин чопчу хайысхалара киирбиттэр.

Сэтинньи 30 күнүгэр Саха сирин олохтоохторун Ил Дархан өрөспүүбүлүкэ салалтатын аатыттан уонна тус бэйэтэ Хомус күнүнэн эҕэрдэлээтэ.  Аан дойду энтузиастарын, учуонайдарын, чинчийээччилэрин, виртуозтарын, хомусчуттарын уонна уопсастыбаннас үгүс өрүттээх үлэлэрин көмөтүнэн саха хомуһа дойдубут үтүө аатын, суон сураҕын кэрэһи бэлиэтинэн буолла, саҥа тыыннанна диэн эттэ. Өбүгэ саҕаттан тыыннаах кэлбит баайбытын – хомуһу харыстыырга, үүнэр көлүөнэҕэ тиэрдэр ытык иэһи умнубакка ыҥырда.

Сэтинньи 30 күнүгэр  Айсен Николаев «Якутия 24» уонна НВК «Саха» ханаалларга «Иннибит диэки, Саха сирэ!» биэриигэ ааспыт ый түмүктэрин билиһиннэрдэ. Уһук Илиҥҥэ РФ Президенэ боломуочуйалаах бэрэстэбиитэлэ Юрий Трутнев уонна Уһук Илин, Арктика сайдыытыгар миниистир Алексей Чекунков өрөспүүбүлүкэҕэ кэлэ сылдьыбыттарыгар кэккэ хайысхаҕа  бырайыактары олоххо киллэрэр туһунан кэпсэппиттэрин билиһиннэрдэ. Ил Дархан өрөспүүбүлүкэ кэлэр үс сылга бүддьүөтэ тыырыыта уратытын, тыа хаһаайыстыбатыгар улахан болҕомто уурулларын, хаһааҥҥытааҕар да элбэх үп көрүллүбүтүн туһунан кэпсээтэ. Маны тэҥэ Ил Дархан социальнай-экэнэмиичэскэй сайдыы эрэгийиэҥҥэ хаамыытыгар тохтоото.

Сэтинньи 30 күнүгэр Ил Түмэн ХХХI уочараттаах мунньаҕар өрөспүүбүлүкэ 2022 сыллааҕы бүддьүөтүн ылыннылар. Эһиил дохуот үрдээн 264,5 млрд солк., ороскуот 267,6 млрд солк. тэҥнэһиэхтээх. Бэйэбит нолуоктаах уонна нолуога суох дохуотпут кээмэйэ 151 млрд солк. кэриҥэ буолла, биһиэхэ итинник дохуот хаһан да суох этэ диэн Ил Дархан бэлиэтээтэ. Саха сирэ бэйэ оҥорон таһаарар дохуотун кээмэйинэн дойду уон бастыҥ эрэгийиэнин ахсааныгар киирдэ. Федеральнай бүддьүөттэн киирэр дотация, субвенция, субсидия кээмэйэ 114 млрд солк. былааннанар. Бүддьүөт социальнай хайысхалаах. үөрэхтээһиҥҥэ, доруобуйа харыстабылыгар, култуураҕа, спортка, социальнай бэлиитикэҕэ  132,9 млрд солк. көрүллүөҕэ.

Дьокутааттар тэрилтэ бас билэр баайыгар нолуокка уларытыылары киллэрдилэр. Эһиилгиттэн эбийиэк кадастровай сыанатыттан суоттаан таһааран, нолуок төлөнөр буолуоҕа. Бастаан 20 тыһ. тахса киһи олорор сиригэр — Дьокуускайга, Мииринэйгэ, Нерюнгрига, Алдаҥҥа уонна Ленскэйгэ — баар атыы-эргиэн кииннэригэр тарҕаныаҕа. 2023 сылтан ыла  бу куораттарга дьаһалта-дьыалабыай кииннэригэр көрүллүөҕэ. Салгыы 2024 сылтан ыла дьиэ-уот бары эбийиэктэригэр туттуллуо. Арктика улуустара бу нолуоктан босхолоноллор. Онтон дьон бас билэр баайыгар нолуогу маннык  2018 сылтан ааҕаллар. Ил Дархан этии киллэрбитинэн, нолуок төлөнөр кээмэйин кыччатыыны ааҕыыга эбийиэк иэнин 150 кв. миэтирэттэн 1000 кв. миэтэрэҕэ тиийэ  үрдэттилэр.

Сэтинньи 30 күнүгэр Ил Дархан хамсык утары хааччаҕы кэлэр сыл тохсунньу 15 күнүгэр диэри уһатар туһунан Ыйаахха илии баттаата. Уопсастыбаннай сирдэргэ вакциналаммыт уонна ыалдьан үтүөрбүт дьон QR-кодунан киирэллэр. 60 саастарыттан үөһэ дьон олорор сирдэриттэн ыраатыа суохтаах эрэсиимнэрэ салҕанар.

Ахсынньы 1 күнүгэр Айсен Николаев Судаарыстыбаннай Дуума дьокутаата Галина Данчикованы кытта көрсөн, кэлэр үс сылга федеральнай бюджекка киирэн, Саха сирэ кыттыахтаах национальнай бырайыактарын тула кэпсэттилэр. 2021 сылга   федеральнай киинтэн кэлэр субсидия суумата 20 млрд 800 мөл.солк. тэҥнэспит эбит буоллаҕына, 2022 сылга ити суума лаппа улаатан, 32 млрд 500 мөл. солк. буолуоҕа.

Ахсынньы 1 күнүгэр  суһал ыстаапка хамсыгы тохтотор соруктаах үлэ түмүктэрэ киирэ тураллар. Билиҥҥитэ күҥҥэ 250-нуу киһи ыалдьа турара биллэр. Олортон үгүстэрэ быһыы ылбатах дьон. Кинилэр ордук ыараханнык бу дьаҥы аһараллар. Хотугу улуустарга быһыыны туруоруу тэтимэ тубуста, 80%-наах кирбиини аһаран эрэллэр. 273 быһыыны туруорар пуунтан 140-на  суһаллык хомуллубут биригээдэ. Онно 985 медик үлэлиир. Быһыы икки компоненын ылбыт киһи ахсаана 60,34 % буолла. Өрөспүүбүлүкэҕэ вакцина арааһа кэлэ турар. Онон суһаллык кэлэктиибинэн иммунитеттаах буоларга дьулуһуохтаахпытын Ил Дархан чиҥэтэн эттэ.

Ахсынньы 1 күнүгэр «Судаарыстыбаннай салайыы. PROдьоҥҥо-2021» форумҥа Уһук Илин эрэгийиэннэрин салайар уорганнара ситиһиилээх ньымаларын, бырайыактарын ырыттылар. Айсен Николаев өрөспүүбүлүкэ судаарыстыбаннай өҥөнү нэһилиэнньэҕэ уонна бизнескэ оҥоруу хаачыстыбатын тупсарыыга уопутун үллэһиннэ. Саха сирэ 2018 сылтан саҕалаан дойдуга биир бастыкынан судаарыстыбаннай салайыыга сыыппараҕа олоҕуран үлэ көдьүүһүн үрдэтэр. Ол түмүгэр нэһилиэнньэттэн уонна бизнестэн киирбит боппуруостары быһаарыы болдьоҕо кылгаабыт. Маны тэҥэ Ил Дархан өрөспүүбүлүкэ бырайыактары салайыыга үлэтэ дойдуга биһирэммитин, «Быраайыак Олимпа 2020» күрэххэ  икки сүрүн номинацияҕа инники тахсыбытын бэлиэтээтэ.

Ахсынньы 1 күнүгэр «Кыһын Саха сириттэн саҕаланар» бэстибээл чэрчитинэн Арассыыйаҕа бастакынан Дьокуускай киин болуоссатыгар өрөспүүбүлүкэбит сүрүн харыйатын уота сандаарда. Бу туһунан бар дьоҥҥо Чысхааны кытта Ил Дархан саха телевидениетыгар быһа эфиргэ иһитиннэрдилэр. Алыптаах түгэни кытта Сахабыт сирин  улуустарыгар харыйа уоттара тэҥинэн умайдылар. «Бүгүн кырыа кыһыммыт дьиҥнээхтик кэлэн, Саха сириттэн саҕаланарын көрдөрдө. Онус төгүлүн ыытыллар бэстибээлгэ биһиги Саҥа дьыллааҕы харыйа уотун уматаммыт, эстафетаны дойдубут атын куораттарыгар биэрэммит, дьикти алыптаах бырааһынньыгы чугаһатабыт», — диэн Айсен Николаев эттэ. Сахабыт сирин олохтоохторугар Чысхаан уонна Великэй Устюгтан Тымныы оҕонньор эҕэрдэлэрин тиэртилэр. Санаттахха, “Кыһын Саха сириттэн саҕаланар” Бүтүн Арассыыйатааҕы бэстибээл иккис сылын онлайн-көрүҥүнэн буолла. Саха сирин норуоттарын кыһыҥҥы этническэй таҥастарыагр күөн-күрэс, “Саха кыһынын сылааһа” хаартыска куонкуруһа, “Үрүҥ көмүс хатырык” уус-уран оҥоһуктар быыстапкалара, “Саха сирин амтаннаах аһа” бэстибээл, муус оҥоһуктар куонкурустара тэрилиннилэр.

Ахсынньы 1 күнүгэр  өрөспүүбүлүкэ баһылыга “Үтүө санаа Харыйата” быйылгы аахсыйаны саҕалаата, уотунан сандаарар Харыйаттан аккырыыкканы булан ылла. Кини “Берегиня” оҕо дьиэтин иитиллээччилэрэ Семен, Данил, Максим Пилютиктарга уонна кинилэр эдьиийдэрэ Майяҕа аптаах остуоруйа кэриэтэ кыс ортото тиийэн кэлэр Саҥа дьылынан, баҕа санааларын толорон бэлэхтэрин анаата. Быйыл алтыс сылын бу аахсыйаҕа кыттар 7-лээх Семен Ил Дархантан радионан салайыллар массыынаны, 9-таах Максим уонна 11-дээх Данил Лего-конструкторы туталлар. Оттон Майяҕа сымнаҕас түүлээх эһэ оонньуура тигистэ. Бу аахсыйаҕа ким баҕалаах кыттара көҥүл. Оҕолору дьоллуур, алыптаах бырааһынньыкка үөрүүнү бэлэхтиир түгэҥҥэ бары кыттыҥ диэн Ил Дархан ыҥырар.

Ахсынньы 1 күнүгэр эрэгийиэн салайааччыта “Биир ньыгыл Арассыыйа” баартыйа уопсастыбаннай приемнайыгар куйаар ситиминэн улуустартан дьону-сэргэни кытары кэпсэттэ, туох көрдөһүүлээх тахсыбыттарын болҕойон иһиттэ. Маныаха боппуруоһу быһаарарга Ил Дархан министиэристибэлэри кыттыһыннарда. «Өрөспүүбүлүкэ олохтоохторун долгутар ыйытыыларга суһаллык хардарыы уонна чопчу миэрэни ылыы — бу биһиги быһаччы эбээһинэспит. Былаас аһаҕас буолуохтаах, дьону-сэргэни кытта кэпсэтиэхтээх», — диир Айсен Николаев. Усуйаана улууһун Хайыр сэлиэнньэтиттэн кэтэх дьиэни киин ититэр ситимҥэ холбооһун боппуруоһун быһаарары туруорустулар. Айсен Николаев Хайырга инвестиционнай бырагырааманан  «Теплоэнергосервис» АУо үүнэр сылга 25 дьиэни киин ититэр ситимҥэ холбуохтаахтаҕын эттэ. Уус Маайа  Элдьикээнигэр оптоволокно ситимин киллэрии болдьоҕун ыйыттылар. Бөһүөлэккэ төлөпүөҥҥэ спутнигынан эрэ сибээс баарын, интэриниэт суоҕун, сибээс хаачыстыбата мөлтөҕүн иһитиннэрдилэр. Ил Дархан Уус Маайа оройуонун дьаһалтатын уонна «Ростелеком» ПАУо икки ардыларыгар түһэриллибит сөбүлэһии чэрчитинэн билигин Уус Маайаҕа Күпкэ диэри сибээс тиһигин тардарга тирэхтэри тутуу үлэтэ ыытылларын иһитиннэрдэ. Балары ахсынньы 15 күнүгэр диэри туруоруохтара. Ол кэнниттэн салгыы Элдьикээҥҥэ диэри оптоволокно ситимэ  тардыллыахтаах. ВОЛС тутуута түмүктэммитин кэнниттэн, бөһүөлэккэ сыл бүтүөр диэри 4G мобильнай интэриниэттэниэхтэрэ. Элбэх оҕолоох ыал ийэтэ авиабилиэтин харчытын төнүннэрэри туруоруста. 2020 сыллаахха тохсунньуга кинилэр дьиэ кэргэн Дьокуускай-Симферополь хайысханан көтөргө сэттэ билиэти атыыласпыт. Ол эрээри коронавирус дьаҥа туран, кыайан барбатахтар. Авиахампаанньа бу дьиэ кэргэн туһаммакка хаалбыт билиэтин ваучерга атастаһарга этии киллэрбит. Оттон дьиэ кэргэн харчытын төнүннэрэн ылыан баҕарарын биллэрэр. Айсен Николаев Тырааныспар уонна суол хаһаайыстыбатын министиэристибэтигэр 2021 сыл ахсынньы 20 күнүгэр диэри элбэх оҕолоох дьиэ кэргэҥҥэ авиабилиэттэрин сыанатын толору төннөрөллөрүгэр көмөлөһөргө соруйда.

Ахсынньы 2 күнүгэр  Айсен Николаев Чурапчы улууһугар Кытаанахха тиийэн, Василий Яковлев-Далан аатынан оскуола-уһуйаан саҥа дьиэтэ үлэҕэ киирбитинэн олохтоохтору эҕэрдэлээтэ. Саҥа эбийиэк 90 үөрэнээччигэ, 25 кыра оҕоҕо анаммыт  аныгылыы тупсаҕай оҥоһуулаах. «Саҥа оскуола-уһуйаан «Тыа сирин кэлим сайыннарыы» федеральнай бырагырааманан тутуллан, оҕолору дэгиттэр сайыннарарга бары усулуобуйа тэрилиннэ. Билиҥҥи кэмҥэ сыыппараны сайыннарыыга, IT-эйгэҕэ ураты болҕомтону уурабыт. Кытаанах оскуолата саҥа технологиялаах оборудованиены туһанарыгар бары кыах баар буолла, IT-кылаас тэриллиитигэр үлэлэһиҥ», — диэн Айсен Сергеевич сүбэлээн эттэ. Итиэннэ кэллэктиибкэ анаан оптуобус атыылаһарга сэртипикээт туттарда.

Чурапчы Арыылааҕыттан Алеша Сокольников сайын РФ Президенэ Владимир Путиҥҥа туһаайан, ынах атыылаһарга көмөлөһөрүгэр көрдөһүүлээх тахсыбыт.  Оҕо баҕа санаатын толорон, “Мындаҕаайы” хаһаайыстыба бу ыалга ынах аҕалан биэрдэ. Чурапчыга сырыытыгар Айсен Сергеевич Алешаны кытта төлөпүөнүнэн кэпсэттэ, Путинтан кэлбит Кэскилээнэ ынаххыт хаһаайыстыба төрдө буоллун диэн баҕа санаатын эттэ.

Бу күн Чурапчы улууһун Дириҥ сэлиэнньэтигэр гаас киирэн, 466 дьиэҕэ күөх уот холбонно. Манна элбэх оҕолоох Анемподистовтар дьиэ кэргэннэригэр Ил Дархан ыалдьыттаата. Эһиил Чурапчы нэһилиэгэр 500 ыалга гаас киирэрэ күүтүллэр.

Ахсынньы 3 күнүгэр РФ Бэрэсидьиэнин уопсастыбаннай приемнайыгар Айсен Николаев дьон ыйытыыларын-көрдөһүүлэрин иһиттэ. Дьиэ-уот боппуруоһа, инбэлииттэр кыһалҕалара, тыа сирин кыһалҕата – барыта болҕомтото суох хаалбатылар. Дьокуускай куорат олохтооҕо тулаайах оҕо категориятыгар түбэһэринэн, киниэхэ анаан куоракка кыбартыыра көрүллүбүтүн, ону түргэнник ылары туруоруста. Ил Дархан куорат дьаһалтатыгар бары докумуоннары түргэнник оҥоттороругар, Саҥа дьылы кыыс саҥа кыбартыыраҕа көрсөрүгэр соруйда. Хараҕынан инбэлиит оҕо ийэтэ уолун өрөспүүбүлүкэтээҕи коррекционнай оскуола интэринээтигэр ыллаттары туруоруста. Уол бастакы кылааска киирбит. Ийэ үс оҕолоох, эһээхийдээх, онон уолун күннэтэ оскуолаҕа таһарыгар ыарахаттары көрсөр. Ил Дархан карантин бүттэҕинэ, уолу интэринээккэ ыларга Үөрэх министиэристибэтигэр сорудах биэрдэ, боппуруоһу тус хонтуруоллга ылла.  Муома олохтооҕо дизельнай электростанция киирэр болдьоҕун туоһуласта. Онуоха Айсен Николаев Хонууга автоматизированнай гибриднэй энергокомплекс докумуоннара госэкспертизаны ааспыттарын, кыһыҥҥы суол аһылыннаҕына тутуу матырыйаала, тэриллэр тиийиэхтэрин, онон 2022 сыл бүтүүтүгэр диэри бу комплекс үлэҕэ киирэрин иһитиннэрдэ.

«Маннык көрсүһүүлэртэн нэһилиэнньэни туох ордук долгутарын уонна олохпутун тупсарарга бүттүүн санаабытын ууруохтаахпытын өйдүүгүн. Онуоха дьон-сэргэ аҥардас өйөбүл эрэ көрдүүр буолбатах, кинилэр туһалаах уонна наадаах көҕүлээһиннэри оҥороллор, этиилэри киллэрэллэр», — диэтэ Ил Дархан.

Ахсынньы 3 күнүгэр Айсен Николаев Саха сиригэр хамсык, дьаҥ туругун туһунан брифинг ыытта. Хааччахтааһын усулуобуйатын арыый да сымнатыы, ыалдьааччы ахсаана аччаабытынан быһаарылынна. Онон успуорт эйгэтигэр күрэхтэһиилэр ыытыллаллара көҥүллэннэ эрээри, билиҥҥитэ көрөөччүтэ суох. Тыйаатырдарга, кэнсиэргэ көрөөччү сааланы 50% буолбакка, 70% толороро көҥүллэннэ. Паркимахерскайдар, массаастанар салоннар, фитнес-кулууптар, эрчиллэр саалалар хаарчаҕа суох үлэлииллэрэ көҥүллэннэ. Дьокуускай куоракка быһыы бастакы компоненын олохтоох нэһилиэнньэ 70% ылла. Ол эрээри оҕо оонньуур сирдэрэ аһыллыбат, күһүҥҥү-кыһыҥҥы дьаҥ намыраатаҕына биирдэ диэн быһаарылынна.

Ахсынньы 4 күнүгэр Айсен Николаев Москваҕа «Биир ньыгыл Арассыыйа» Сийиэһин түмүктүүр түһүмэҕэр кыттыыны ылла. Сийиэс бэлитиическэй баартыйа төрүттэммитэ 20 сылыгар ананна. Президиум саҥардыллыбыт састаабын билиһиннэрдилэр, баартыйа үрдүкү сэбиэтин бюротун чилиэннэрин анаатылар, итиэннэ чугастааҕы сылларга тутаах соруктары  чопчулаатылар. Сийиэс былаһааккатыгар сүрүн тиэмэнэн «БарыБииргэ» волонтердар хамсааһыннарын кэскилин туһунан кэпсэттилэр. Бу туһунан былаас бэрэстэбиитэллэрэ, быраастар, эспиэрдэр дьүүллэстилэр. РФ Бэрэсидьиэнэ Владимир Путин бэлиэтээбитинэн, «Биир ньыгыл Арассыыйа» «БарыБииргэ» хамсааһыны биир бастакынан өйөөбүт. Баартыйа элбэх чилиэнэ уонна бу баартыйаны өйөөччүлэр пандемия саҕаланыаҕыттан волонтер буолбуттара.

«Саха сирэ бу хамсааһыҥҥа куруук инники күөҥҥэ сылдьар — пандемия саҕаланыаҕыттан уонна быйыл сайын кытаанах тургутууну ааһарбытыгар ону итэҕэтиилээхтик көрдөрдүбүт. Саха сирин олохтоохторуттан үксүлэрэ волонтердар үлэлэригэр быһаччы кытыннылар. Бүттүүн күүһү түмүүттэн волонтердар ахсааннара элбээтэ, уопсастыбаннай суолталаах үлэ хайысхатын кэҥээтэ», — диэн Ил Дархан бэлиэтээн эттэ.

Өрөспүүбүлүкэҕэ волонтердар кэккэлэрэ хаҥыыр. Өскөтүн 2020 сыллаахха 50 тыһ. киһи эбит буоллаҕына, билигин кинилэр ахсааннара 60 тыһ. киһиэхэ тиийдэ. Кинилэр бэйэлэрин үтүө санааларынан, баҕа өттүлэринэн кырдьаҕастарга, доруобуйаларыгар хааччахтаах дьоҥҥо, оскуолаларга, мэдиссиинэ тэрилтэлэригэр көмөлөһөллөр, социальнай бырайыактары олоххо киллэрэллэр, үтүө санаа аахсыйаларыгар кытталлар. Пандемия саҕаланыаҕыттан #БарыБииргэ аахсыйа чэрчитинэн 60-тан үөһээ саастаах уонна доруобуйаларынан хааччахтаах дьоҥҥо баҕа өттүнэн көмөлөһөөччүлэр СӨ волонтердарын куорпустарыгар түмсүбүттэрэ. Маннык үлэлиир ыстааптар өрөспүүбүлүкэ бары улуустарыгар тэриллибиттэрэ. Гражданскай көҕүлээһини өйөөн,  Ил Дархан Граныгар куонкурус ыытыллар.

Ахсынньы 5 күнүгэр Ил Дархан Саха сиригэр Оҕо хамсааһынын күнүнэн салайааччылары, настаабынньыктары уонна лиидэрдэри истиҥник эҕэрдэлээтэ.  “Өрөспүүбүлүкэҕэ баар 783 оҕо уопсастыбаннай тэрилтэтин кыттыылаахтара барыга бастыҥ, төрөөбүт дойдуга бэриниилээх, билиигэ дьулуурдаах буоларгыт үөрдэр. 12 тыһ. волонтер оҕоҕо махталбын тиэрдэбин. Кыраны-кыамматы аһынар, көмөлөһөр – үтүө хаачыстыба. Итинник майгылаах оҕоттон үтүөкэн киһи иитиллэн тахсар. Быйыл Бүлүү, Орто Халыма, Ньурба, Аллараа Халыма уонна Дьокуускай оҕолорун холбоһуктара Ил Дархан Гранын ыллылар. Кытаатыҥ, үтүө дьыала туһугар иннигит диэки дьулуһуҥ!” – диэн Айсен Сергеевич оҕолорго туһаайан ситиһиилэри баҕарда.

Ааптар: Афанасий Ноев, Ил Дархан пресс-сэкирэтээрэ

Следите за самым важным и интересным в Telegram-канале и WhatsApp-группе ЯСИА