Уус Алдаҥҥа Хоро нэһилиэгэр бибилэтиэкэ үлэһиттэрэ сэргэх тэрээһини тэрийбиттэр. Кинигэни таптаан ааҕааччыларга анал ааттары туттарбыттарын туһунан нэһилиэк бибилэтиэкэрэ Ксения Кириллина СИА-ҕа кэпсээтэ.
«Маннык тэрээһин сыллата ыытыллар. Маныаха кинигэни ааҕааччы ахсаана элбээн иһэрэ үөрдэр. Быйылгы күрэстэһии түмүгүнэн «Саамай элбэх кинигэлээх ыал» аатын Альбина, Семен Ивановтар ыллылар. «Сахалыы кинигэни мунньар ыалынан» Людмила, Юрий Ушаковтар ааттаннылар. «Саамай элбэх хаһыаты, сурунаалы суруйтарар дьиэ кэргэн» — Октябрина, Григорий Петровтар, «Саамай элбэх ырыанньыктаах» — Марина, Роман Копыриннар буоланнар үөрдүлэр. «Саамай ыйааһыннаах кинигэҕэ» Анна Емельянова (1,9 кг), «Саамай кыра кинигэҕэ» Айталаана Пухова, «Саамай улахан кинигэҕэ» Людмила Ушакова, «Саамай былыргы кинигэҕэ» Дмитрий Курилкин кыайыылаахтарынан таҕыстылар», — диир кини.
Маны сэргэ, быйыл «Саамай аҕа саастаах ааҕааччы» анал аатын 81-дээх кырдьаҕас Егор Копырин ылан долгуйбут. Егор Иннокентьевич быйыл 53 кинигэни уларсыбыт. Ытык кырдьаҕас билиигэ-көрүүгэ тардыһара ыччакка холобур буолар диэн бу күн мустубут дьон киэн туттан бэлиэтээбиттэр. Онтон «Саамай кыра саастаах ааҕааччынан» икки аҥардаах Ангелина Бурцева ааттаммыт. Кыыс төрөппүттэрэ оҕолорун көтөхпүтүнэн бибилэтиэкэҕэ куруук кэлэллэрэ үгэс курдук буолбут. Кэнникинэн кыысчаан сарсыарда уһуктаат кинигэ көрдүүрэ, аахтараары көрдөһөрө үксээбит. Дьоно киниэхэ анаан уларсыбыт кинигэлэрин Ангелина дьиэтигэр тиийээт, хайаан да көрөр, ыйытыы бөҕөтүн биэрэр, аахтаран тэйэр үгэстэммит. Эбиитин аахпыт кинигэлэрин кэпсии-кэпсии ол ис хоһоонуттан сөбүлээбит дьоруойун уруһуйдуу сатыыра дьонун улаханнык үөрдэр эбит.
