Быйыл Өрөспүүбүлүкэ күнүн көрсө Таатта Чөркөөҕөр П.А.Ойуунускай аатынан Саха Өрөспүүбүлүкэтин судаарыстыбатын музейыгар күүтүүлээх мэҥэ өйдөбүнньүк силигэ ситэн, кэмэ туолан туруорулунна.
Былатыан Ойуунускай киинэ түспүт төрөөбүт сиригэр кини үлэтин-хамнаһын үйэтитэр музей 2012 сыллаахтан үлэлиир. Былаан быһыытынан бу сылларга музей тас көстүүтүн бырайыагар олоҕуран Былатыан Ойуунускайга мэҥэ өйдөбүнньүк туруоруллуохтааҕа. Билиҥҥи үп-харчы кырыымчык кэмигэр Емельян Ярославскай аатынан бас музейбыт директора Н.Д.Бугаев көҕүлээн, бүтүн коллектив ылынан Чөркөөххө Былатыан Ойуунускай саҥа мэҥэ өйдөбүнньүгэ оҥоһуллан кэллэ! Онон бас музейбытыгар махталбыт муҥура суох.
Мэҥэ өйдөбүнньүк композитнай матырыйаалтан оҥоһуллубут, скульпторынан Чөркөөхтөн силистээх Иван Попов буолар. Удьуор уус Поповтар – Миитэрэйээн Попов аҕабыыт сыдьааннара буолаллар. Онтон скульптор Иван Попов Чөркөөххө күн сирин көрбүт бастакы идэтийбит худуоһунньук Иван Васильевич Попов сиэнэ. Былатыан Ойуунускай Тааттаҕа кэллэр эрэ Иван Васильевич Попову быһа ааспакка ыалдьыттаан , баттаҕын сөбүлээн кырыйтарара диэн ахтыыларга баар. Бэл Иван Васильевич, Былатыан Ойуунускай баттаҕын кырыйан уурбута диэн кэпсииллэр, кини мэтириэтин уруһуйдаабыта биллэр. Хомойуох иһин Ойуунускайы баһааҕырдыы быыһык кэмигэр мэтириэт сүппүтэ.
Скульптор Иван Попов төрөөбүт улууһугар хас да мэҥэ өйдөбүнньүк ааптара буолар. Былатыан Ойуунускай айымньытыгар олоҕуран федеральнай суол аартыгар турар “Көтөрдөр” мэҥэ өйдөбүнньүк кини үлэтэ.
Чөркөөххө Иван Иванович Былатыан Ойуунускай мэҥэ өйдөбүнньүгүн аҕалсыбыта. Ааптары кытары кэпсэтииттэн ыллахха: “Айар үлэ үгүс толкуйтан, сыраттан тахсар. Бэл испэр кинини кытары кэпсэтэн, маннык буолуохтаах диэн харахпар ойуулаан көрдүм. Былатыан Ойуунускай кэлэрин дьон иһиттэҕинэ мастан тырыбына оҥорон көрсөр этилэр. Онон норуот өйдөөн хаалбыт уобараһын олоххо киллэрэн — тырыбынаҕа тыл этэ турарын оҥордум. Тоҕо диэтэххэ, кини устар ууну сомоҕолуур улахан араатар, уҥуоҕунан төһө да намыһах буоллар, төлөннөөх, уоттаах тыл этэн бардаҕына — Ньургун Боотурга тэҥнииллэрэ. Оннук сырдаан, улаатан көстөр эбит”, — диэн бэлиэтээтэ Иван Иванович.
Былатыан Ойуунускай төрөөбүт алааһыттан чугас олохтоох, Ойуун ууһун нэһилиэгиттэн төрүттээх, кини сүбэтин-саргытын истибит норуот суруйааччыта Д.К.Сивцев-Суорун Омоллоон ахтыытыгар: « Барахсаным, сынан көрдөххө, нарынын, холкутун. Чачархай баттахтыын, иҥнэри бэскилиин, саһарчы көрбүттүүн, туттардыын-хаптардыын, илиилиин-тарбахтыын эчи сымнаҕаһын, налыытын. Мүччүччү соҕус туттар уоһун мичээрэ киһини тартаҕын”…. диэн ааҕабыт. Мэҥэ өйдөбүнньүккэ Былатыан Ойуунускай уобараһа сырдаан, мичээрдээн турара чочуллубут. Суорун Омоллоон ахтыытыгар дьүөрэлээн киһини көрсөр…
Чөркөөххө Былатыан Ойуунускай мэҥэ өйдөбүнньүгүн туруорарга-таҥарга күүс көмө буоллулар Емельян Ярославскай аатынан бас музейбыт үлэһиттэрэ А.М.Ховров, И.И.Попов, музейбыт сэбиэдиссэйэ М.Г.Аржаков, В.В.Яковлев, олохтоох ОДьКХ үлэһитэ Н.Н.Барашков, иһэрдии үлэтин Н.Г.Петров оҥордулар.
Таалар хонуулаах, тардыы тамылҕаннаах күөх Таатта эбэтин утары көрөн турар Былатыан Ойуунускай мэҥэ өйдөбүнньүгэ кэнчээри ыччакка дойдуну муҥура суох таптыырга үтүө холобур буолан ыҥыра, кэпсии туруохтун.
Ааптар: Светлана Халгаева, Былатыан Ойуунускай аатынан музей исписэлииһэ.
Хаартыскаларга Былатыан Ойуунускай саҥа мэҥэ өйдөбүнньүгэр үлэлэр
С.Аввакумова хаартыскаҕа түһэриилэрэ.
