18 От ыйа 18.07
  • 18°
  • $ 88,09
  • 96,3

Бу өрөбүллэргэ - «Дыгын оонньуулара». Петр Старостин күрэххэ кыттыбат буолла

13:01, 04 декабря 2020
Текст:
Читайте нас на
Яндекс Новости
ЯДВ

Сарсын-өйүүн «Өрөгөй» споркомплексыгар кэтэһиилээх «Дыгын оонньуулара» ыытыллыа. Пандемиянан сибээстээн күрэхтэһии көрөөччүтэ суох барыа. Спорду сэҥээрээччилэр бөҕөстөр киирсиилэрин НВК «Саха» араадьыйатын, тэлэбиисэрин нөҥүө истиэхтэрэ, көрүөхтэрэ.


Быйылгы кыттааччылар улахан аҥардара — «Дыгын оонньууларын» сэттэ төгүллээх чөмпүйүөнэ Ивана Белолюбскай салайар «Боотур» спортивнай кулууп иитиллээччилэрэ.

«Биһиги кулууптан Егор Филиппов, Николай Матаннанов, Дьулустан Ноговицын, Алексей Уваровский, Айсен Семенов, Павел Друзьянов уонна саҥа кыттааччылар Егор Свинобоев уонна Никита Новгородов киирсиэхтэрэ. Егор Свинобоев 70 кг диэри ыйааһыннаахтарга өрөспүүбүлүкэ многоборьеҕа чөмпүйэнээтигэр иккис миэстэни, Никита Новгородов 70 кг үөһээлэргэ — үсүһү ылбыттара. Онон «Дыгын оонньууларыгар» кыттар толору бырааптаахтар. Быйылгы сыл дьарык чааһыгар ыарахан буолла. Ким ханна, хайдах кыахтааҕынан бэйэтэ дьарыктанна. Онон спортсменнар туруктарын туһунан этэр ыарахан», — диир Иван Белолюбскай.

Чурапчы бөҕөһө Петр Старостин Оонньуулартан устунарын биллэрдэ. «Икки сыллааҕыта Чурапчыга ыытыллыбыт «Тоҕус томтор» күрэххэ сүүрүүгэ буутум былчыҥын эчэппитим. Былырыын Дыгыҥҥа эрэйдэммитим, кыратык да хамсанарбар ыарыытын биллэрэр этэ. Онон быйылгы Оонньуулартан устунарга сананным. Доруобуйа инники күөҥҥэ турар. Этэҥҥэ буоллахха сайыҥҥы Оонньууларга кыттыллыа», — диэтэ СИАҕа спортсмен.

Инньэ гынан, Дыгын оонньууларын кыайыылааҕын туһугар 13 бөҕөс илин-кэлин түһүө.

Күрэхтэһии иккис түмүктүүр күнүн НВК «Саха» быһа эфиргэ күнүс 14 ч. киэһэ 18 ч. диэри көрдөрүө. Маны таһынан ютубка nvk—online.ru ханаалга көрүөххэ сөп буолуо. Күрэхтэһии буолуо үс күн иннинэ спортсменнар коронавируһунан ыалдьыбаттарын туһунан ыспыраапка аҕалыахтара.

Күрэхтэһээччилэр:

  1. Варданян Артем (Нам улууһа)
  2. Друзьянов Павел (Чурапчы)
  3. Колесов Иннокентий (Кэбээйи)
  4. Матаннанов Николай (Таатта)
  5. Новгородов Никита (Уус-Алдан)
  6. Ноговицын Дьулустан (Горнай)
  7. Протодьяконов Алексей (Томпо)
  8. Свинобоев Егор (Мэҥэ-Хаҥалас)
  9. Семенов Айсен (Өлөөн)
  10. Уваровский Алексей (Кэбээйи)
  11. Федоров Владимир (Ньурба)
  12. Филиппов Егор (Хаҥалас)
  13. Филиппов Леонид (Амма)
Следите за самым важным и интересным в Telegram-канале и WhatsApp-группе ЯСИА
Тутаах тыллар